背心短褲係時候出籠喇！不過照吓塊鏡見到自己肥肥腫腫當堂無晒mood啦！𠵱家想做運動KeepFit唔使理天氣，落雨打風都可以去FitnessClub，而且有啲Club有得玩之餘仲有得食，非常方便。之但係做運動前後進食更容易令人變肥，辛苦消耗嘅脂肪又隨時UTurn返嚟搵你，所以呢幾間Club嘅食物崇尚低卡低脂，食咗都唔驚肥啦！
記者：馬慶武
攝影：伍慶泉、林栢鈞
Model：Yannie
FitnessFirst飲品落補品
以健康為主，上環FitnessFirst內只有一間Mix，亦係全港唯一一間開設喺FitnessClub嘅Mix。主要售賣果汁三文治類食物，而且有埋專為健身人而設嘅特別服務──喺飲品度加補品！補品當然唔係人參、海味，加落去果汁度嘅補品分別可以補充體能、維他命、鈣質，另外仲有專為收身或變大隻而設嘅健體粉，飲果汁兼補一補，舒服晒。最緊要係所有Mix嘅食物都會列明卡路里，等你計掂條數先放入口，罪惡感無咁重囉。
墨西哥辣牛肉全麥麵捲餅$40
比較惹味，用上辣牛肉令口感無咁齋，不過全麥麵捲餅都係健康食品，含540個卡路里。
豆腐野菇椰菜卷$35
豆腐、野菇都係健康素菜，而且醬汁少少酸少少辣，最重要係只含390個卡路里，唔會白做。
Matcha-Licious$34
據講綠茶可以有抗氧化同降低膽固醇作用，加上不同果汁，感覺好清新，不過營養師話做運動前唔好飲高纖飲品，否則可能會出現肚瀉，聽話喇！
睇住嚟食唔驚肥
FitnessFirst（31063000）
地址：上環新紀元廣場中遠大廈地下至3樓
健身價：$1,500永久入會費，月費$649（簽約1年）、$749（簽約3個月）
Pure做完Gym落Bar
做得健身，應該係食輕量食物，但係Pure裏頭就有一間格調十足嘅餐廳，唔只俾你坐低飲啖水吹吓水，仲可以晚飯直落。既然係餐廳，當然有好多菜式選擇，沙律主菜甚至雞尾酒都有供應，不過同FitnessClub連埋一齊，點都要顧吓人感受。呢間Red就提供大量低脂低熱量菜式，難得賣相味道都屬頂級，約朋友做完Gym食個飯仲可以傾吓偈飲吓嘢，唔使特登去蘭桂坊咁遠㖭。
燒三文魚配薄荷葉$178
賣點係含有高蛋白質，對肌肉生長有幫助，而且呢碟係主菜，當晚飯食已經好足夠。
紅椒汁茄子卷$108
雖然眼見烹調方法比較複雜，但係實際口味材料一樣清淡，賣相吸引，標榜低卡、低脂。
Pure（81298000）
地址：中環IFC第2期P4層
健身價：永久會員入會費$1,999、月費$1,199
California最少嘢食
正確嚟講，California其實係無咩好食，有嘅只係健身食品。無餐廳無Cafe，肚餓頂籠都只可以買到EnergyBar。不過咁，如果定力低嘅就應該揀California入會喇，因為California無嘢引你食嘛，你知做完運動嗰下幾咁肚餓㗎啦！營養師都話做運動前後1個鐘都最好唔好有嘢落肚，咁先至可以徹底達到燃燒脂肪呢個目的。
ApexFitProteinBar $18
營養師話做運動前最好食ProteinBar，咁做運動嘅效果會更佳，而且亦會有充滿力量嘅感覺。
ApexFitDrinkMix $278
做完運動補充蛋白質嘅飲品，而且含少糖低脂，最適合不過喎。
California（23668666）
尖沙嘴店地址：尖沙嘴彌敦道23-25號彩星中心G/F-4/F
健身價：最新優惠6星期$199（查詢熱線：29090880）
街頭烈女話……
營養師黃榮俊：運動後1個鐘才進食
「運動前，唔應該食太多含澱粉質嘅食物，因為會令血液流向腸胃，肌肉嘅血氧會較少，令到做運動時表現差，效果亦無咁好。另外如果食高糖份嘅食物，更會令脂肪難以分解，達唔到減肥效果。
做完運動後最快半個鐘先好食嘢，最好係1個鐘後，飲水就唔怕，不過唔建議飲運動飲品，因為運動飲品糖份好高，其實呢啲係畀一啲最少連續1小時做劇烈運動嘅人補充糖份嘅，汽水就更加唔好，一般飲清水補充水份已經足夠。」
健身教練：「做完食高纖食物」
FitnessFirst設有私人教練服務，教練除會建議客人可多做邊類運動外，仲會提議飲食配搭同習慣。擁有高級私人教練證書嘅David就話：「控制飲食因人而異，想練大隻就最緊要吸收；如果想減肥，做完運動應該多食高纖維食物，因為高纖食物容易令人有飽肚感覺，不過亦唔可以只食高纖食物，蛋白質、脂肪等都要攝取，不過比例可以細啲。」
私人授教收費：$600/hr
Yannie：FitnessClub有嘢食埋梗係最好，最緊要方便嘛，仲可以唔使換衫。
