噚日，孫柏文同大家從傳統傳媒公司未來角度去討論過，一段𠵱家網上非常流行，名為「巴士阿叔」嘅短片（圖）。片裏面係講位年輕巴士乘客，因為睇唔過眼前面有位阿叔講電話講得好大聲，所以就拍咗嗰位阿叔嘅膊頭，阿叔被拍膊頭之後，即刻發難，段短片就係佢哋嘅對答過程。
噚日，我亦都講過，如果大家想睇段短片，可以去youtube.com，用「巴士阿叔」、「林尚義」、「巴士」、「阿叔」去搵呢段片，全條片長5分59秒。
前日，我有機會同《利字當頭》一欄總舵主利世民兄，討論「巴士阿叔」嗰段片。傾偈途中，我發現世民兄原來因為專心湊女，所以已經同社會年輕一代脫節。哈、哈！原來佢係未睇過呢段片，連聽都未聽過。所以我就第一時間，用隻金手指上網等佢睇吓。以下就係佢一路睇，一路同我講嘅意見。
有壓力大晒呀
片段播放15秒之後，利世民兄話：「個後生仔又係嘅，人哋講電話，拍乜鬼阿叔個膊頭呢？我話個阿叔鬧佢鬧得啱。」
片段播放37秒之後，利世民兄講：「個阿叔都幾好嘢，係個厲害嘅談判對手。佢一開波就默認自己講電話大聲，因為佢一開始就話自己壓力好大，亦用咗『壓力』呢個藉口，成功佔有道德高地去炮轟個後生仔。個後生仔又唔識挑戰個阿叔佔有道德高地究竟啱唔啱。其實，個後生仔只要反問阿叔：『有壓力大晒呀？殺人放火吖，笨？』已經可以喺阿叔度搶番道德高地。後生即係後生，唔使再睇落去，都知道個後生仔死梗。」
片段播放3分45秒之後，利世民兄又話：「個後生仔絕對講得啱，個阿叔真係想淨係攞個彩，想個後生仔表露真誠嘅歉意同完全屈服。不過個後生仔真係好似香港嘅典型後生仔，怕惡人不過又唔甘心屈服，口口聲聲講對唔住，身體語言完全唔服，仲喺度寸寸貢咁話，道歉係因為個阿叔想攞彩，而唔係因為自己錯。阿叔睇見個後生仔講對唔住，不過又攞唔到個彩，自然將行動升級，要個後生仔伸出雙手，握手言和去『解決』呢個『問題』。好心個後生仔啦，橫掂都係扮晒死狗，就扮得有誠意啲。走去握手言和，都仲要話握手係為咗順個阿叔意，唔係認錯。仲要加多句無厘頭嘅說話，同個阿叔講『有緣再見』，做咩呀？下次見到個阿叔嘅時候去報復咩？抵佢俾阿叔寸番轉頭，話可以隨時『隻dup』，哈、哈！」
好諷刺嘅結局
片段播放5分21秒之後，利世民兄話：「咩話？問候屋企人？Sorry，畀我係個後生仔到呢個point，我就一定唔會再忍落去，我一定會同個阿叔講：『壓力好大咩？問候屋企人？』跟住就兜巴兜巴星落佢塊面度，唔醒佢就唔係利世民！我對啲問候我屋企人嘅人係咁暴力㗎喇！」
所以各位，如果見到一個30多歲嘅男人，抱住個BB女，就千祈緊記唔好問候佢屋企人啦！為免惹嚟傷身之禍。
後記:孫柏文覺得段片最搞笑嘅地方，就係兩個人充滿火藥味嘅對答，係喺阿叔個電話又一次響起嘅鈴聲下結束，多麼諷刺啊！
孫柏文