賭王同十姑娘喺澳門打緊官司，消息一度打殘濠賭股，但隨着昨日大市極速反彈，多隻濠賭股亦好似食咗藥咁勁升。由阿仔主理的新濠（200），一度炒至最高20.65元，收19.75元，至於家姐嘅信德（242）亦唔弱，升5.67％，收10.25元，但對比12元樓上高位，仍然差緊一截。
傳歐資基金上車
經紀陳就話，最近多咗聲氣的黃金集團（1031），股價終於見到突破，江湖傳聞隻股會有集資活動，有歐資基金上車。
相對其他濠賭股，黃金集團股價落後好多。由英皇娛樂酒店（296）以至澳門實德（487），股價今年以來已陸續自低位反彈好多。黃金集團背景甚勁，除咗持有兩間澳門酒店外，查實重有注入賭廳概念，但股價居然長期在2元邊徘徊，似乎唔多啱數。
黃金集團昨升6.74％，收2.375元，係近8個月新高，成交股數379.2萬股，金額875.2萬元。
慕容小初