針唔拮到肉，睇電視劇還可以高談闊論，一個大隻型男性無能令人同情，唔知痛嘅師奶們個個邊睇邊覺得可以好似邵美琪咁偉大。現實，就算面對一個正常偏「虧」的男人，女人們在床上仍有要求有投訴，何況性無能？窮、醜、肥、瘦、惡、懶都可能接受到，性無能可以嗎？如果你不幸係性無能嘅男人，免得傷口被灑鹽受傷害，不要看下去！
記者：馬慶武
攝影：陳盛臣
Profile
早射遲射都嫌棄
「點為之性無能先？會唔會係弱咋？」性知識有限，但對性的好奇就無限，香港風氣愈來愈開放，後生女可能好後生已經有性經驗。有性經驗，才會知道性是愛中不可缺少的重要部份，才會明白若伴侶性無能，帶來的影響深度。在她們心目中，早洩、陽具太細也算是性無能，Cat更誇張地說：「好似遲洩都算係性無能喎，即係做個幾兩個鐘都唔識射。」令男人自覺驕傲的持久力，在女士眼中原來可以是性無能的症狀，妳又點睇？
W：Winnie
C：Cat
R：Ruby
C：「太細算唔算？係咪即係唔識硬？」
R：「早洩係唔係？聽講遲洩都係，嘩，做唔停喎，慘過無！」
C：「我都會介意男友呢方面嘅能力，即係等於工作能力，但呢啲可以喺拍拖之前考慮到，但係性能力就要一齊咗一排先會知。」
W：「知道嗰陣唔通嫌咩？無計㗎啦！」
R：「性無能唔話我知，我會覺得佢呃我。」
C：「點講呀，唔通示愛補多句：『我想同你一齊，不過我性無能喎！』」
R：「呢方面唔得，影響深遠呀！我試過有個男朋友未割包皮，做親都會痛，佢割咗之後，親密啲，感情都好啲。」
W：「若未開始已經知，好難一齊。唔介意就假嘅，但如果我好愛佢可能接受到。」
R：「男人有性需要，女人都有㗎，唔可以同自己鍾意嘅人做愛生仔，好難接受。」
C：「生唔到仔仲可以領養，做唔到愛就係性無能，仲大鑊。」
R：「唉，總之免得過都唔會揀啦！」
無能靚仔惹人同情
看得《火舞黃沙》多，覺得無能男應該是大隻的。大隻佬，沙灘最多，所以今次訪問在沙灘進行。當筆者扮緊不經意昅住9點鐘位置個白色比堅尼靚女時，估不到3個女仔同時邊睇邊品評緊沙灘上的大隻仔，昅人者，也被昅。「大隻靚仔梗係想望多兩眼，但講到做男朋友，唔使一定要靚仔。」「最緊要正常。」「女人睇性呢樣嘢真係唔係咁重。」各持己見，外形、性格、經濟能力，女人揀男人，需唔需要考慮埋性能力呢？
C：「靚仔有型又點，我都唔係求靚仔，靚仔花心呀！」
R：「性無能仲可以花心？靚仔性無能，咁咪仲穩陣。」
W：「如果吳彥祖性無能，幾靚仔都難媾到女啦。」
C：「咁我情願醜樣但正常。」
W：「但如果係靚仔又大隻，好似黃德斌咁會令人同情啲。」
R：「係囉，女人好容易因為同情而鍾意一個人。」
C：「我覺得女人喺呢方面係好啲，男人可以無愛都有性，但女人唔得，已係最大分別。」
W：「女人唔可以有性無愛，但都未必可以有愛無性喎。」
R：「就算接受到，都會好似《火舞黃沙》邵美琪咁隱瞞。」
W：「自己死忍好辛苦啫，都可能會同朋友訴苦，不過唔可以俾男友知道你同人講囉。」
R：「男人咁要面，性無能又無樣睇，梗唔講得啦。」
W：「會唔會同父母講呢？」
C：「更加唔會，老人家恨抱孫實反對，根本無得傾！」
「我會搵第二個幫我解決需要！」
有問題，總要解決，可以只愛不做，但始終有需要。男人性無能當然是慘事，自卑往往令人產生懷疑，其實伴侶所受的壓力亦不會小，沒有性的關係，更難維持。要繼續，也要找辦法，未燒到自己嗰叠，當然可以淡然一句：「愛佢咪得囉！」那如何解決性需要？自慰是ModelAnswer，語出驚人的Ruby卻說：「我會繼續同佢一齊，不過會搵個男人專幫我解決性需要！」面對沒有生育能力的女人，男人大條道理出去滾，甚或找另一個女人生仔；女人，一樣有這諗法，在適當或有需要的時候，女人總覺得男女應該平等。
W：「唓，要解決性需要有幾難？」
R：「係囉，佢得唔得都可以DIY。」
W：「𠵱家仲有好多玩具揀㖭，好似試衫咁試到啱都得。嗱，不過我未試過衫㗎！」
R：「如果好鍾意，我唔會同佢分開，但係會搵第二個男仔解決我性需要，哈！」
C：「嘩！你講嘢咁大膽！」
R：「男人出去滾都多多藉口啦，咁嘅情況底下我去搵人慰藉都好有道理。」
W：「有時唔係講需要，係講做愛感覺。」
R：「係囉，我之前都講過，最享受嘅唔係高潮，係同最鍾意嘅人嗰種親密嘅感覺。」
C：「但始終水乳交融先係愛嘅最高境界。」
W：「不過我估如果我男友唔得，而佢又好愛我的話，佢會幫我解決需要㗎喎！」
R：「係囉，佢仲有手又有口。有時呢啲前奏功夫仲舒服過真做。」
W：「咁唔通你會想你男友唔得好過得？」
R：「係呀，唔使煩！」
C：「但係邊Work㗎，呢啲嘢係大家情到濃時先會做，如果佢唔得又點會有興致？」
W：「性無能即係對性無晒興趣？」
C：「我諗係啩！」
R：「係咩？」
無能點算？
性無能唔係性病
性病及皮膚科醫生黎湛暉：「性無能唔係性病嘅一種，可以係心理問題亦可以係生理問題。至於染上性病會否引致性無能？可以咁講，性病引起嘅性無能只會係短期，即係你見到自己生殖器官有問題，你都唔會用佢住。但性病就好少會引致長期嘅性無能。」
性無能和不育是兩件事
香港性教育促進會會長黎定基：「性無能即係未能插入，即不能性交。可能會喺插入前已經洩出，又或者可能係完全未能勃起，完全無興奮感覺。如果係勃起之後能夠進入並摩擦，就算只係10秒8秒，都只可以話係早洩，唔係性無能。至於女人，如果女人性無能，就稱為性冷感，即係對性事無興趣，就算受到外來刺激都無反應。」
Ruby：「男人求『性』心切，女人最擔心男人𡁻完鬆完再唱，男人性無能，可能女人會少一份擔心。」
