正所謂男人唔壞，女人唔愛，好似《這該死的愛情》男主角Rain咁，明明爛撻撻爛仔格，竟然有女為佢跳橋自殺，連女主角恩碩都走唔甩，講明被玩弄都唔介意！鬼咩，韓天王Rain今回扮型到爆嘅爛仔，女人唔冧就奇！今日《蘋果》就送出30套《這該死的愛情》DVD豪裝，有齊紀念冊、明信片，想攞就快手填妥兩關問題及個人資料，Fax過嚟畀我哋啦！
記者：招佩珊
發行：MediaLink
語言：粵語、韓語
字幕：繁體中文、英文
《這該死的愛情》DVDBoxSet
名額：30個
每套價值：$499
獎品總值$14,970
拳手Look晒胸肌
Rain一改靚仔形象，以一身爛撻撻造型示人，比《浪漫滿屋》懶有Style嘅明星Look型仔百倍，10個掂係滿分，佢有20個掂！
香港觀眾大抵都係憑《浪漫滿屋》認識Rain呢位韓國小天王，今次喺《這》劇中所飾演嘅角色，係一個爛撻撻嘅拳手，同《浪漫滿屋》中所飾演嘅明星少爺仔李英宰，性格造型完全大相逕庭。不過，筆者覺得上次英宰太重脂粉味，今次呢個打仔Look就最襯佢，連男編輯睇完張相都讚佢型，唔係女人先至冧！上次《浪》嘻嘻哈哈喜劇一齣，要演得好唔算難，今勻實情係佢嘅演技大考驗；文戲，佢真係喊到滿面眼淚鼻涕，武戲，拳拳到肉、起晒飛腳都唔用替身，唔止淨係得個樣。
愛情復仇催淚彈
《這》係講Rain飾演嘅福丘因誤會女明星恩碩（申敏兒飾）貪錢，同Rain哥哥分手，及後哥哥更因為得知恩碩要同有錢仔訂婚的報道，失足墮樓變咗植物人；Rain為了報仇，不惜使橫手擔任申嘅保鑣接近佢，以美男計令申戀上自己；當Rain令申愛上自己願意放棄一切時，Rain卻向申坦言只係玩弄佢，令申傷心不已。雖然Rain成功為哥哥復仇，但佢覺得毫不痛快……
去到尾嗰幾集，Rain與申明明深愛對方，就算哥哥最終死咗，Rain礙於兄弟情，佢更愚昧到想愛而不敢愛，筆者呢個Fans都睇到幾乎想打爆個芒，扯晒火！不過，若然你接受到呢類煽情韓劇，《這》肯定令眼淺嘅觀眾喊到變豬頭。
遊戲篇
想攞番套《這該死的愛情》DVDBoxSet，睇Rain型爆嘅拳手Look，就先要連過兩關，再將正確答案同個人資料填於參加表格內，Fax過嚟就有機會獲得。
第1關：估扮相
Rain主演過3套韓劇，以下呢6幅圖就係來自呢3套劇嘅造型。呢一關就係要大家分辨每個造型係來自邊一套劇？
（A）《小爸爸上學去》、（B）《浪漫滿屋》，抑或（C）《這該死的愛情》？
第2關：選擇題
1.Rain飾演嘅福丘，平時最鍾意咬住支乜嘢？
A.香煙
B.珍寶珠
C.雪條
2.劇中福丘無做過以下邊種職業？
A.保鑣
B.拳手
C.侍應
3.《這》全劇共有多少集？
A.16
B.20
C.24
參加辦法
1.參加者須將答案填妥在參加表格內，並聯同個人資料*，傳真至23075869，即有機會獲獎。
2.遊戲時間為今日早上10:00至下午5:00，過早或逾時均作廢。每人只限參加一次，每次只可傳真一張表格，多過一張者以第一張為準。
3.答中所有問題而又最早傳真**的頭30名參加者各得到《這該死的愛情》DVDBoxSet一套。
4.如沒有參加者答中全部問題，則以答中最多問題及傳真時間**最早者可獲獎。
5.得獎者將有專人通知。
6.為公平起見，《蘋果日報》及MediaLink員工、家屬不得參加是次遊戲。
7.《蘋果日報》對賽果保留最終決定權，參加者不得異議。
*參加表格上之姓名須與身份證相同，否則將被取消資格。
**以本報傳真機所顯示的時間為準。
備註：必須憑報紙上的參加表格才可以參加遊戲。