唔經唔覺，「任三招」面世已經一周年。呢個措施，擺明係要配合人民幣改革。過去1年，人民幣嘅發展令人歎為觀止，照呢個勢睇，國內金融業開放步伐會加快，人民幣變成硬貨幣嘅路，由以往漫漫遙長變成冇咁長。哈，唔知任總任內，會唔會見到呢一日呢？
講起任總，華華聽熟悉夏威夷房地產市道嘅老友講，話最近當地有個盤成交，係一個海景Penthouse，非常之靚，價值成2000萬港銀，邊個咁大手筆？就係任總。
任總去年薪酬接近1000萬，若然佢真係買呢個豪宅，都只不過動用2年人工啫，都唔算係乜嘢大投資。至於佢買嚟自己住定博升值就唔知，如果自己用，咁1年去度幾次假，平均計都幾貴。咁留番第日退休用得唔得先？任總退休，冇咁快啩。
聯儲局前主席格林斯潘今年初退咗休，佢在位之時人工好奀，但退休之後單係演講費都收到手軟，賣咗出書嘅版權就更加有排使。所以任總攞1000萬其實唔係太多──如果佢退休真係去海邊隱居唔搵錢嘅話。
李華華
讀者如有任何意見或報料，歡迎發送電郵至[email protected]。