𠵱家啲發展商講嘢，真係信佢哋半成都死，除咗明明減緊價又唔認，明明冇賣又報賣咗之外，更騎呢嘅係明明賣咗都唔敢認，真係俾佢哋激死。好似長江實業（001）副首席營業經理黃思聰上個月19號擘大「四隻眼」，差啲發埋毒誓咁滯，話因為睇好豪宅後市，長實要將大坑名門封盤唔賣，最快都要下半年先解封咁話。
但係蘭西最近睇土地註冊處嘅成交紀錄，發覺有幾宗名門嘅一手註冊登記，係喺19號之後先成交，今個月中去做註冊。好似2座28樓B室，成交日期係上個月29號；而3座39樓B室，成交日期為上個月25號。唔通呢啲交易係假嘅?若然唔係假，你話如果當時信發展商真係咁睇好後市，要封盤吊高嚟賣，而急急腳走去高價買咗其他樓嘅話，撞啱最近嘅樓盤劈價潮，就真係揼心啦。