記得細個每次去旅行時，媽媽總係會將兩盒提子乾放落我背囊裏面，直到今日，先發現呢款兒時恩物原來係另類藥膳，因為據中醫說，當月事來潮，搞到腹痛心煩、面青口唇白時，只須食適量提子乾，當中所含豐富鐵質有助補血，咁以後就算嚟料，唔使搽厚厚嘅胭脂都可以紅卜卜啦！
記者：黃若茵
攝影：周旭文
模特兒：Crissie@PureModels
示範：周師傅、呂師傅@香港喜來登酒店
鳴謝：加州葡萄乾管理委員會
1日1包補鐵質
提子乾含有各種維生素及礦物質，所含的鐵質是製造紅血球的必要元素，缺少鐵質會導致貧血、臉色蒼白、疲倦等，女士們因每月經期特別容易患上貧血。人體每天必需吸收10-15毫克的鐵質，一小盒的提子乾已滿足到這個份量，女性吸收後有助回復紅潤面色。
提子乾師傅有來頭
周師傅兩年前參加「加州提子乾世界烹調大賽」攞到銅獎，今次整番兩味得獎菜。有15年經驗嘅周師傅話：「煮提子乾嘅最大問題係佢嘅味道太甜，處理唔好會令食物過膩，所以要學識控制甜味。如果能夠做到保持提子乾嘅甜味之餘，又唔會蓋過其他材料嘅味道，咁就叫成功喇！」
專責甜品，鍾意用提子乾因為味道夠濃縮，配合冧酒就可以讓提子乾嘅味道發揮得淋漓盡致。
提子乾配蟹肉沙律一啖幾味
價錢：$100/1人
需時：25分鐘
將提子乾夾進層層叠的沙律中，利用清新的番茄及青瓜平衡提子乾的甜膩，吃時每啖均可嚐到各種配料的不同口味，讓提子乾的味道甜得不經意。
材料：
提子乾、紅蟹肉各半碗、番茄1個、青瓜6片、黑水欖3粒、雞蛋1隻、沙律菜、些厘酒、牛油、杏仁各少許
做法：
1.切粒後的黑水欖跟提子乾混和，蟹肉切絲，青瓜及半個番茄切粒待用，另一半番茄混入些厘酒絞爛作配汁置於碟面，以拳頭敲擊碟底令茄汁更均勻。
2.用圓形倒模將蟹肉放於最底層，蟹肉份量較其他材料多1/3厚度。順序放入提子乾、青瓜粒、番茄粒及沙律菜。
3.剩下的提子乾跟杏仁碎、牛油、雞蛋絞爛，壓平後以120℃焗10分鐘。焗後將餅塊裁成直角三角形，並放於圓棍上固定彎曲形狀，便成了於沙律旁的三角提子餅裝飾。
Tips：
放置每一層的材料時必須用力壓，否則拿走倒模時會令整個沙律散開。
法式春雞配提子乾豉油汁
價錢：$78/1人
需時：35分鐘
春雞肉質幼嫩，利用提子乾豉油汁一焗頓時變得香脆，口感極佳。薯茸內混入提子乾及枝豆，將軟綿綿的提子乾及爽口的枝豆兩種口感相撞，一絕！
材料：
法國春雞仔2隻、提子乾1碗、薯仔1個、頭抽少許、日本枝豆、雞湯各半碗
做法：
1.雞湯及頭抽跟提子乾一起煮及絞爛；
2.將部份煮好的提子汁淋到春雞上，醃15分鐘後放進焗爐，以180℃焗10分鐘；
3.將枝豆、提子乾及剩下的提子汁跟薯茸一起混和，攪勻後即可上碟，於薯茸上放置焗好的春雞便可。
白朱古力慕絲配薄荷汁提子乾
價錢：$42/1人
需時：45分鐘
本身甜味濃稠的提子乾，當然是甜品的首選配料，混入薄荷酒的慕絲能於純粹的甜味中引起清涼的味道，令甜品甜而不膩。
材料：
薄荷酒10毫升、魚膠片3片、忌廉30毫升、雞蛋1隻、白朱古力10克、提子乾半碗
做法：
1.先將白朱古力及魚膠片以暖水坐溶待用。拂起忌廉及雞蛋至米白色，加入薄荷酒、已溶的白朱古力及魚膠片攪勻；
2.倒進三角形模內，先倒一半，放上一層提子乾，份量可按個人喜好而定，再將剩下的慕絲倒入模內。
Crissie：好少淨食提子乾，但就好鍾意食提子麥包，清淡嘅麵包夾住甜甜嘅提子乾，幾好味㗎！
