賭波流行，世界盃就快到，相信投注額極為暢旺，六月份嘅賽馬投注額肯定受影響。昨日講過資深馬迷K為咗要親子，每個星期六日晚上在家睇波，佢話父子感情好番晒，冇前年咁疏離。難怪嘅，入馬場，個仔冇份，喺屋企，睇波落注話咁易，兩父子淨係講下注利物浦還是韋斯咸，已經傾足成個鐘頭，唔記得星期日係母親節。
外國馬場係准細路入場嘅，細路唔准賭，但可以同父母一齊食飯，到草地玩捉迷藏或者其他遊戲。香港點解唔得呢？有好多外籍馬會會員唔係幾滿意，因為佢哋好想帶埋仔女入場也。不過特區政府好怕一啲夠聲大嘅團體（馬會係有頭有面團體，反而聲音唔夠大，因為馬會只識與高官講道理，唔會上街抗議大聲嘈，政府唔驚有二萬名會員嘅馬會及幾十萬馬迷，反而驚有一二百人嘅甚麼關注組），唔願意批准馬會容許馬迷帶十八歲以下細路入場。
細路唔知馬場係乜，但知道碧咸、朗拿甸奴係邊個，對賭波甚有認識。今年世界盃，大家下注邊一隊贏呢？大熱門應該係巴西，英格蘭本來有機會，但兩名前鋒奧雲、朗尼都跛咗，能否出賽甚有疑問，冇佢兩個，點贏呀。英格蘭喺四十年前在本土舉行嘅世界波，贏過一次。當年英雄阿倫波爾（AlanBall）嚟香港參加國際七人足球賽，接受《南華早報》訪問，感嘆英隊雁行折翼，前鋒讓雙車，而另外兩位前鋒（高治、禾確特）未成氣候，贏世界盃機會大打折扣，中後場人選一流都冇用。呢位阿倫波爾四十年前只有二十一歲，係奪標英雄中年紀最細一個，當年隊長卜比摩亞（今年冥壽六十五歲）已因癌症逝世。阿倫波爾代表英格蘭七十二次，做過六次隊長，一九七一年由愛華頓轉會阿仙奴，轉會費係破紀錄嘅二十二萬鎊，唔夠今日碧咸嘅三星期薪水。阿倫波爾點都算係一代球星，但為咗搵食，八十年代嚟香港打過「東方」。兩年前為咗喺西班牙買一間屋與兒女相聚，將佢嘅世界盃冠軍獎牌賣咗，值十四萬鎊，朗尼、奧雲賭波嘅注碼都不止此數啦，廉頗老矣，英雄晚年好令人唏噓。