證監會噚日刊發05至06年度年報，打破以往沈聯濤出嚟親身介紹嘅做法，冇開記者會，可能係新主席韋奕禮嘅新作風。
不過今年年報有一樣新內容，就係公開咗執行董事嘅薪酬，已離職嘅就冇得睇，所以唔知沈主席袋幾多走人。當中最高薪嘅係中介團體及投資產部執行董事林張灼華，有505萬元，當中花紅佔100萬元。至於韋奕禮只有164.8萬元，但由於舊年6月至加盟，而且有4個月未做主席，所以未知佢全年人工。
唔好睇證監作為執法機構，啲職員一定好Cool，其實佢哋都有鬼馬一面，佢哋成立咗一個「積極義工隊」嘅義工小組。好似去年聖誕，為大角嘴區嘅兒童及家長舉辦聯歡會，由老外職員扮聖誕老人，今年農曆新年又探訪路德會安老院嘅長者，由證監調查員扮財神，向老人家拜年（圖）。睇嚟證監職員都幾玩得。