港股年初至今，平均每日成交金額逾300億元，似乎已成為港股正常的成交水平。市場除追捧港交所（388）炒高至60元水平外，亦有基金追捧一些受惠港股成交大增的經紀股，大福證券（665）係其中之一。
據悉，大福自4月初已被芬佬睇中並慢慢收集，大福公布業績後入市回購，股價一度升至2元水平，最近港股大幅調整，大福亦跌得頗急，周二低見1.38元，足足跌咗3成。不過，芬佬繼續收集，港股噚日回升，大福一度升近10%至1.59元，最後收1.51元，升4.14%。
為何芬佬在芸芸經紀股中看好大福？唔通大福所持的港交所股份比新鴻基公司（086）更多？答案「非也」。芬佬純粹係睇好大福網上股票買賣業務，原來近兩年，大福往內地做咗唔少宣傳推廣，吸引唔少內地客透過大福的網上平台買賣股份，令其證券經紀業務有可觀增長，今年有望派高息。大福今日除息，05年度末期派息3仙，全年派5仙。
中國銀行（3899）今日正式招股，噚日只見中行保薦人之一瑞銀力撐建行（939），建行在3.50元水平沽壓相當大，若非大市大幅反彈，建行在資金換馬至中行的情況下，可能會下跌。
華基（155）上周五在深圳搞投資推介會，介紹佢哋嘅太陽能發電新技術，如何可減低成本。不過基金似乎興趣唔大，公司想配股集資，但到𠵱家仍未有動靜。
基金接貨連達硬淨
連達科技（889）大股東OnboardTechnologyLimited以及其他股東在上周五配售7560.2萬股，每股低至1.10元，以恢復街貨最低流通量。其中有1630萬股落入基金景順投資手上，唔怪得連達股價企得咁硬。連達噚日收報1.65元，升1.85%。
阿虎