煲呔連任後，如無意外都會向黨派派吓餅仔，例如分啲司局長職位出去，唔係啲黨派容乜易作反？不過，田少聽到呢啲乜司長物局長就搖搖頭，話有位都未必做啦。嘩，口氣大到咁，有乜解究？田少自己親自細數四大理由。
第一樣係乜？田少竟然係話朝九晚十一好難頂，富貴黨真係唔同啲；第二就係好難再有時間打理生意，咁又係，成班黨員個個都有大生意做咁，又點捨得放手？另外，做官要俾議員鬧，面皮薄啲都捱唔住，何況佢哋個個有頭有面？
最後一個原因，都好重要喎，就係佢哋呢班空降高官，好難點得郁班公務員；冇馬仔撐自己，又點可以做到嘢呢？所以諗落都係唔撈好過撈。
田少仲笑笑口話，民建聯要做就由得佢哋做，自由黨就會自量喇。唔做司局長，做唔做特首呢？田少衰衰咁話，特首我哋更加冇能力做啦，煲呔民望咁高，呢份工唔易做㗎。八方聽落，田少好似「帝」煲呔多過讚佢咁喎。
傳真︰2623-9278
電郵︰[email protected]