爆機狂迷：解讀遊戲版《DAVINCICODE》　扭盡六壬破密碼鎖

爆機狂迷：解讀遊戲版《DAVINCICODE》　扭盡六壬破密碼鎖

全球勁賣6千萬本嘅小說版《達文西密碼》，題材敏感引嚟全球宗教爭拗！電影版今日正式公映，無論你睇完戲意猶未盡，又或想預溫故事背景，呢隻遊戲版都值一玩，事關集合《生化危機》刁鑽解謎，亦有《MetalGear》潛入玩法，刺激度爆燈！

文：陳福榮

故事講述哈佛大學宗教符號學教授羅柏蘭登（RobertLangdonp），因目擊一宗懾人兇案而被視為殺人犯，結果要喺密碼專家蘇菲納佛（SophieNeveup）嘅協助下逐步解開箇中真相，更發現耶穌與達文西等人前所未有嘅驚人秘密！為咗增添趣味同可玩性，操作角色並唔係只有男主角咁齋，玩到咁上下就會變成用女主角去營救佢，甚至二人合力對付難關，裏頭變化一啲都唔少。

■和電影一樣的密碼鎖，往往都要借它幫忙。

解謎似查案

佢嘅冒險要素好鬼似90年代啲美式冒險Game，都係靠文字提示同選用合適道具嚟過關，好似喺《Bio0》咁Check件道具，仔細睇真啲有冇咩蛛絲馬迹隱藏起嚟，譬如開始時要喺女主角張卡片背面搵番個電話，至可以成功撥出電話繼續玩落去。亦因部份謎題好講求文字解讀性，為照顧玩家，系統會儲低你打聽過嘅資料同情報，隨時可以Call番出嚟睇，唔使下下用紙筆抄低咁麻煩。另一方面，遊戲有幾分似《逆轉裁判》咁俾你響「檢查模式」逐吋調查現場環境，想開啟通往下個目的地嘅道路，就必須先解開眼前嘅疑難，再加上幾有趣嘅謎題小遊戲，完全啱晒鍾意玩《Bio》嘅香港玩家。

■這個似曾相識場面，就是解開所有謎團的開端。

■這幅蒙娜麗莎畫像似乎有點異樣。

■須花盡腦汁，先可解開著名嘅「玫瑰線」之謎。

功夫弱避得就避

戰鬥系統可算擁有《Bio》與《MetalGear》特色；當被巡邏中嘅警衞或意圖不軌嘅刺客發現時，會即時進入打鬥模式，基於主角們只係普通人，拳腳功夫麻麻，最好都係小心翼翼行動，走近敵人至撲過去施予強力一擊盡快KO佢。仲有打贏咗並唔代表啲咩，你要好似玩《MetalGear》咁將條友盡快拖到陰暗位，如果唔係俾人發現就大鑊，又要打餐飽。

■當遇上礙事的守衞時，就要盡快解決他。

■神秘刺客出現了！要戰鬥還是躲避？

■如被警衞發現了，全力一戰無可避免。

造型有別電影版

事實上呢隻Game比起其他電影改編作品，一啲都唔失禮，起碼畫面水準同遊戲性有番咁上下！唔知係咪肖像權傾唔掂數，兩個主角點睇都唔多似電影版造型，喺呢方面略見失望。尤其係羅柏蘭登，同湯漢斯爭九里遠！原來開發商只係照住小說設定嚟做，所以係呢隻電影遊戲最失真地方；大家都係當佢小說遊戲看待好啲囉。

■怎樣看他們也不像湯漢斯和柯德莉塔圖。