近日俾詹培忠鬧到「街知巷聞」嘅港交所行政總裁周文耀（圖），唔出聲時個樣真係Cool到爆，不過睇嘢梗唔可以咁表面，Paul周份人其實幾有幽默感，就好似前兩日，佢喺上市公司商會個午餐會度演講，幾句開場白，已經令唔少在座人士掩住嘴笑，就知佢功夫幾到家。
Paul周一上台，先幽主人家小賭王何猷龍一默，話接到商會邀請，就開始諗演講主題，第一時間諗住講港交所新董事局（當時仲未選），但家吓無謂講啦！梗係，唔通人哋請食飯，仲要「潤」人選唔到咩！有口痕友話，小賭王選港交所董事前信心十足，所以早幾個星期，已經約定周文耀嚟演講，點知……
做演講嘉賓真唔容易，諗題目諗到頭都爆。周文耀話諗過講港交所股價拆細，但係仲未開始傾，冇乜好講；不如講創業板諮詢？之不過諮詢期延長咗（延至5月底），又唔講得住啦！咁不如第二階段「收窄買賣差價」喇？但預知當日有人踩場請願，都係慳番啖氣。度來度去，最後決定以「上市公司資料訊息披露電子化」為題，呢個題目就冇咁惹火啦。