【本報訊】全球哄動的電影《達文西密碼》今日在港正式上畫，預料本地盜版集團已蠢蠢欲動，欲趁機分一杯羮。有電影業人士估計，該片在港票房可高達3,000萬元，海關版權及商標調查科則強調，會24小時監察有關情況，總之「你一出、我就冚」。
香港電影導演會名譽會長張同祖估計，以《達》書的受歡迎程度及該片的宣傳攻勢，估計本港票房至少可達3,000萬元，其他同期上演的影片難攖其鋒，「呢啲惹起咁多爭議，一定會好受歡迎，好似《受難曲》（ThePassionoftheChrist）咁，反對聲音愈大，佢就愈賣。𠵱家連天主教徒都話要入去睇吓套戲有啲咩嘢講得唔啱，咁至少有一班捧場客。」
盜版集團處於積弱狀態
張同祖說，電影《達文西密碼》投資龐大，在首映前出現翻版或BT下載的情況相信並不容易，「發行商同電影公司一定會睇得緊好多，唔會咁容易將條片流出街外。」他分析，即使有「老翻」出現，對票房收益都不會構成太大衝擊，「呢啲大片會有較佳保證，好多戲迷願意花錢入戲院，好似《無間道》，有翻版咪照樣咁旺場。」
海關版權及商標調查科高級監督譚耀強接受訪問時則表示，海關會全天候監察情況，暫時未見有關該片的翻版活動，他承認一些熱門新片，如《達》片確實會「睇得緊啲」，因為「盜版其實都係生意，佢哋（盜版集團）都想趁機賺錢」。
譚強調，盜版集團已處於積弱狀態，海關矢言不會放過任何打擊盜版的機會，況且近年盜版集團已不敢明目張膽「做生意」，只能偷偷摸摸「吊住條命」，售賣盜版光碟的黑點，亦由高峰期的1,000多間，回落至目前只剩30至40間，生意亦大不如前。