滙控（005）除息1.17元，收140.60元，唔計息升2.80元，計息升夠3.97元。滙控加埋中移動（941），總共拉高恒指168點，包咗恒指全部升幅222點嘅7成半。
中銀（2388）收市前7分鐘，有人連掃4檔，貨量有12球，佔全日總成交3成，銀碼1億9，收15.85元，進賬0.20元。中行招股，肯定漪歟盛哉，咪認為炒友會沽中銀攞錢去抽中行，不利中銀，應該咁睇，中行招股爆燈，炒同氣連枝，會拉高埋中銀，至少市場心理對中銀有利。滙控表演完，輪到中銀上場。
市場諗住中行招股有盛況，交銀（3328）郁定，收5.20元，升0.10元。交銀郁，建行（939）亦唔會失禮，收3.50元，向上移動1格，未夠。
中銀C輪3590：摷中銀C輪炒，3590昨日只由71仙升到78仙，最值得敲。隻輪10月中夠鐘，溢價5.1%，槓桿率20.3倍（有效10.2倍），引伸波幅21.4%。嫌溢價稍高，則向9068埋手。
建行C輪2293：交行郁，本來交行C輪都值得諗吓，不過升得太急，不如諗吓建行C輪，正路選2293。隻輪8月初到期，輪價46仙，溢價1.9%，槓桿率7.6倍（有效6.3倍），引伸波幅30.5%
章盛