齊秦下月會喺紅館舉行首個演唱會，佢日前接受商台訪問時就話入行二十年都冇喺香港開過個唱，真係有啲遺憾，所以今次嘅舞台會有唔少變化，有構思以狼眼為背景。齊秦仲話自己以前唔識浪漫，𠵱家已經改善咗，所以希望早日成家立室。講番工作，齊秦預計明年喺北京開音樂學校，會搵張藝謀做名譽顧問㖭。