交銀噚日第一次喺香港出信用卡，長駐上海嘅執行副行長葉廸奇，業績會後未曾露過面，但噚日都親自撐場做主禮。可惜，呢個本地薑嘅普通話認真普通，所以索性用廣東話演說，就係咁，俾舊年8月升做大中華總經理嘅柯如龍（ChrisClark）搶晒風頭，佢雖然係澳洲籍，但普通話流利過中國人！
柯如龍話，11歲開始已經喺學校學中文，仲係自己要求選修，柯如龍呢個中文名，都係佢第一個中文老師幫佢改嘅，佢都唔知有乜特別意思，或者係因為自己屬龍喎！之後佢喺西安住咗兩年，一邊教英文一邊學普通話，唔怪之得普通話咁勁啦！
不過佢啲閩南話就冇咁好，話說佢02年加入VISA，做駐台總經理，但到家吓都唔係好識聽同講閩南話。