潮州怒漢詹培忠為咗第二階段「收窄買賣差價」件事，上個星期四先喺大庭廣眾指控港交所周文耀「謀殺」，噚日又出招，聯同一眾經紀代表，直接踩上去周文耀個場度交請願信，仲預先通知晒傳媒影相採訪，好有部署。有好戲睇，華華梗係第一時間到場趁墟啦！
話說個行動本來4點半開始，但臨時提早15分鐘，金勞詹自己4點未夠，就企定定喺交易廣場外面，問佢做乜唔入去，佢話未夠鐘（仲以為佢等吉時到㖭！），跟住講唔夠兩句，佢就將一大叠新聞稿質畀華華，叫華華幫佢派畀在場嘅傳媒行家，自己繼續留守大後方，搞到華華俾行家誤會係怒漢嘅阿四。
好戲陸續上
終於齊人開波，金勞詹率領一眾經紀，擺好Pose度好晒位，等Paul周出嚟接信兼影番張威水相。對於金勞詹踩場攞彩，見慣大場面嘅Paul周話：「唔怕，大家咁多年老友！」擾攘咗約半粒鐘，結果請願信收咗，Show亦做完，咪繼續等研究商討囉！唔係你想點呀？
金勞詹話，呢次就交請願信，傾唔掂就會日日去馬仔度嘈佢，又會同政府建議，廢除港交所專利權，開多兩三間交易所，仲計劃緊喺6月4日搞個幾百人大遊行，睇嚟好戲陸續有嚟。
上次佢同任總互片之後，都有約埋一齊食飯，問佢今次「片」完Paul周，仲會唔會同對方食飯？詹Sir開頭口硬話「使乜同佢食呀！」之後轉口話會，但對方應該冇期囉！
李華華