行得AV線，另一個工作就係做埋「買手」，每逢遇到一啲熱門又難搵嘅機，總會有人託你搵吓！話說小記幾十年老同學，叫我搵部CanonIXUS800IS，規格中規中矩；600萬像素、4倍光學變焦，加埋強勁DIGIII處理器同鐵盒仔機身，我都認為買得過！行咗西菜幾間連鎖舖，新機落場竟然全無蹤影；辛苦啲順藤摸瓜，捉住個分貨嘅行街嚟捽！點知佢都居然話冇貨，係咪咁好賣呀？
個行街仲話，賣就真係好賣，來貨亦非常之少，不過最氣頂係「官」字兩個口，明明冇貨派落場，仲要篤住手指將機價減$200，搞到日日俾人狂追貨！至於下一批貨幾時到，完全係無了期嗰隻，所以大家如果係心頭好，真係見到就好出手喇！
記者：朱崇德