港股昨日下晝開市嗰陣，受日股大散328點拖累，最低跌到16248，冇咗246點，埋單只係唔見101點。同時，期指則反升108點。
期指前日低水264點，昨日縮到55點。計埋本月恒指成份股除息拖低約100點，𠵱家期指實際係高水45點。短期大市，跌勢已告一段落，似樣嘅反彈就在眼前。昨日所提嘅恒指C輪4506可列作埋手嘅對象。昨日最低之時，如果有膽同有運，撈4506，到收市嗰陣已經坐緊13%利潤。
中移動C輪4451：大市因跌得過急而反彈，重磅股通常都會有勢，吼中移動C輪，主角係4451。隻輪8月初夠鐘，輪價39.5仙，溢價4.6%，槓桿率10.8倍（有效7.2倍），引伸波幅35%。
4451係中移動熱門C輪，啱短炒。3756亦係熱門貨色，5個半月命，冇錯槓桿率20.6倍大好多，但要畀23.6%溢價，你買埋我份，咪手多。
電盈C輪9773：電盈C輪9773上周四由42.5仙爆升到最高75仙，最近3日回落到38仙，又係細細注博反彈時機。隻輪6月尾夠鐘，溢價1.6%，槓桿率13.4倍（有效8.6倍），引伸波幅39.3%。電盈（008）昨收5.10元，跌0.10元，博正股回升番三兩格，揸9773已經得米。
章盛