韓國電影三寶，嚇餐飽驚慄片、笑餐死胡鬧片，不過講到最老本行者，都係「愛到死」嘅愛情片；今個星期新碟落場《我和我的女友》，好明顯是《藍色生死戀》同《八月照相館》一類「愛到死」的苦情延續，但配上當時得令的戇男車太鉉同美女宋慧喬，再加上韓國著名巨濟島天然靚景，營造出有如「維他奶」般純純的愛情感覺！
記者：朱崇德
《我的野蠻女友》車太鉉搭配《浪漫滿屋》宋慧喬，好明顯係食人氣，看準後生客出擊；碟價唔算太貴，普通版$98、限量版將DVD碟封套做到成本精美畫冊一樣，「粉絲」們相信要破財喇！呢$110撐自己偶像點都唔慳得。今個星期首批推出的《我和我的女友》，隨碟會附送一個心形相框手機繩，發行果真識冧客。
30億韓圜愛情故事
由第1日開始學人拍拖，就明白浪漫嘅愛情故事，每每由金山、銀海堆砌出嚟！《我》就足足用了30億韓圜（約$2,460萬港元）製作費用，以同類片種嚟講，真係幾花費吓！導演更是處女下海的全潤秀，據知佢曾參與著名導演江在圭成名作《生死諜變》的製作。
故事主要係講男女主角是高中同班同學，宋是品學兼優的校花，而車則是一個平凡的小男生，同其他未開竅的情場初哥一樣，戇直又口齒唔伶俐，點諗都唔會有女仔鍾意；誰知宋原來從小學開始已暗暗喜歡上他的戇直，還主動示愛，正是女追男隔層紗，你俾我都𦧲飯應啦，兩人的愛情故事由此而萌芽！後來兩人被同學故意安排，孤男寡女共赴旅行，二人雖被整蠱但甜在心頭，車與宋度過了有生以來最難忘愉快的一天，可是宋突然暈倒不支，生離死別的苦戀，已成這對小情人的宿命。
巨濟島靚景襯苦戀
唔好話筆者連結局都講埋出嚟，叫大家睇得冇癮！事關電影一開首已是以倒序的手法拍攝；以既定結局玩呢類苦戀愛情故事，導演好似連大家想估邊個死嘅樂趣都剝奪埋。故事背景，有如發生在香港70、80年代，純如「維他奶」的愛，當然要以一個優美的環境做襯托，所以拍攝場地特別搵嚟古樹小鎮、方田木屋的巨濟島；車宋踏着單車結伴放學，小息買個包齊齊食，既是同窗又是小情人，真係拍出這種純純的愛之感覺，只經歷過蒲MK、Hea尖嘴的香港年輕一輩，真係好難體會。
至於演員方面，車飾的戇男好似未能跳出《我的野蠻女友》的框框，而且仲好有扮𡃁仔之嫌，至於宋的學生裝，加上佢唔多化妝，真係成份純情學生味道出晒嚟！戲中的小插曲，是車爺爺的一段初戀，戰火鴛鴦慘被拆散，苦苦相思50年，忽然一日竟得知情人西去的噩耗，苦等半個世紀只得見死人一面，那份癡真係使人為之動容。
Bonus：車宋蝦碌狂咀
Bonus都係例牌菜，製作特輯、預告片及相片集等；製作特輯裏面最好笑，係話車太鉉原來勁鍾意踩單車，導演仲笑稱佢差唔多用單車遊勻成個巨濟島，真抵死！不過更正嘅係睇見車同宋蝦碌互咀鏡頭，睇戲時見佢哋一臉情深，攝影機一Cut即刻笑咗出嚟，真離譜！
發行：年代影視
語言：韓語DD5.1、dts
字幕：中、英
片長：98分鐘
級別：I