鄧萃雯主演的《女人唔易做》周日結局篇勁收，最高收視41點，有264萬觀眾捧場，由於大部份為師奶捧場客，無綫遂於本月底開拍一部以師奶為題材的輕鬆喜劇，暫名為《師奶兵團》，劇中雯女除與葉童大鬥演技外，還會與《女人唔易做》的「賤Man」謝天華飾演夫妻，再續前緣。
鄧萃雯主演的無綫新劇《師奶兵團》（暫名），將於本月底開拍，參與演出的還有商天娥、葉童和姜大偉，劇情是講述他們四個居屋師奶的故事。劇中姜大偉因為喪妻而父兼母職，負起煮飯湊仔的師奶工作，雯女與謝天華繼《女人唔易做》後再續前緣飾演夫妻，婚後產有一對龍鳳胎，至於葉童與郭政鴻，以及商天娥和艾威亦分別扮演夫妻。
「肯定主婦地位」
雖然《師》劇中雯女與謝天華再續前緣，但監製林志華強調並非是《女》劇的延續，他昨日在電話中說：「由於電視劇大部份擁躉都係家庭主婦，所以我哋開拍一個貼題啲嘅劇集。
「師奶其實係一個職位，網上有調查出咗，話如果要出糧畀師奶嘅話，年薪要過百萬，因為佢哋做晒所有家務、湊仔煮飯要叻、又要幫仔女補習、24小時全天候服務，兼且冇假期冇病假，我哋呢部劇集，就係去肯定家庭主婦嘅地位。今次故事人物會係中下層少少，佢哋全部都係住喺居屋。」
書友變為鄰居
而雯女跟葉童兩位居屋師奶還會大鬥法，林志華說：「雯女同葉童讀書時係同學，雯女係校花，葉童係高材生，兩個由細鬥到大，後來兩個住埋同一個居屋，又再鬥餐飽。」
採訪：戴彩煥
