渣甸山係老牌豪宅區，地區形象夠高貴，一路以嚟都有好多名人明星捧場，買樓自住或者做收租佬，其中最熱門當然係嘉雲臺，美聯李志強話，現時嘉雲臺海景單位呎價超過1.1萬元，山景呎價亦接近1萬蚊，唔係人人可以負擔，所以，區內享有開揚景觀嘅單幢式豪宅，好似年達園咁，都有唔少買家問價搵貨。
李志強話，坐落布思道、毗鄰栢麗園嘅年達園，每層兩伙，樓高19層，分層有1100幾呎，最高兩層係超過2000呎嘅複式。業主都好惜貨，放盤唔多，個別更情願放租，好似由藝人杜德偉及其家人持有嘅中層B室，1117呎，近排以市價每月3萬蚊租出，呎租27蚊。單位94年9月購入價係795萬元，回報4.5厘，以豪宅區租金回報計，非常理想。
唔好以為蘭西淨係識地產嘢，其實間唔中都睇吓娛樂版，當年杜德偉同周汶錡拍拖時，就係住喺年達園間屋度，日日好招搖咁揸住架逾百萬元保時捷出入，俾人影晒相。
根據紀錄，年達園最新成交係1月份嘅中層單位，873萬元，如果杜德偉放售個單位，應該有得賺。