港股跌勢未止，連續大跌3日，恒指噚日最低落到16248，再大跌近250點，但由高位回落已有成千點後，在低位已明顯見有較強支持，午市尾段反彈，恒指收市僅跌101點，而期指則升番108點，收16338，低水大為縮窄，只有55點。
上升股（唔計認股證）雖然仲有210多隻，但噚日跌勢頗為全面，除藍籌外，H指亦下跌過百點，連近日表現較強勢同有消息的二三線股，沽壓亦見大增。大市落到16200點水平，照計應有一守之力，而大部份股票經今次震倉後，貨源收得更亁，整固完成後，後市會升得更急。
噚日大市低開，一早已諗住博中油（香港）（135）反彈，一路忍，忍到3.75元才落手，但估唔到跌勢急到要去到3.6元才定得住，好在呢一下時間唔係好耐，未幾就反彈，有驚無險。
跟住午市就上演戲肉，原本一路且接且走的大行買盤，午後突然發動攻勢，由3.8元開始係咁掃，先上4.0元，唞一唞，再掃到4.275元，尾市略為回順，收4.2元，終於逆市而升1個位，全日成交1.1億股，係上日嘅2.9倍，可見好淡鬥得幾咁激烈。
上升空間有5成
中油由高位5.1元掉頭回落，短短半個月內，跌到3.6元，足足跌咗3成，噚日一下拗腰上番去，且有大成交配合，成個單日轉向格局，今日再升，就可確認。
油價呢輪在70美元水平上落，基本條件冇大變，中油股價急挫，只係早前急升後的一次技術性調整，大行噚日接貨接得咁「應」，睇佢哋幾時再操番上去而已。
中油05年往績PE5.5倍，呢個數字有水份，扣除17億元因收購所產生的一次性負商譽，每股盈利係40.5仙，升150%。去年加權平均實現油價41.57美元，升43.94%，毛利率亦由40.3%升到48.8%。
06年，以全年油價在70美元計，平均實現油價會再大升，估計中油盈利可達35億元（再無一次性的入數），每股盈利72.5仙，以保守的9倍計，股價可見6.4元，有50%的上升空間。
郭兆誠