澳門銀行公會噚日出咗份通告，由七月一號開始，星期六再唔係法定嘅銀行營業日，各大小銀行可以自行決定，周末開門與否。嘩！八方知道當地四月先開始傾五天工作制，前後不過一個月左右，就已經有定案，唔讚何厚鏵有效率都唔得。
同樣係搞五天工作制，香港銀行公會傾咗一大輪，先至定到九月四號，開始實行五日結算，銀行就只得滙豐一間表咗態，話九月行五天制，其他就仍然研究緊。嗱！呢個例子，就講明一樣嘢，就係做大都未必着數得晒，細都有細嘅好處㗎！人哋澳門就係因為細，手起刀落搞掂，慳番唔少諮詢研究嘅時間，又點會唔快呢又？各位星期六要過大海幫襯賭王，就記住帶多啲cash，唔好旨意可以去銀行攞錢。
爆料熱線：29290000、27860099
報料傳真：26239278
報料電郵：[email protected]