「我有壓力，你有壓力，你做咩挑釁我呀？」如果閣下睇完呢一句說話，就即刻喺腦海中浮現出，一場喺巴士上層兩位乘客嘅對答，咁孫柏文就要恭喜你，因為你仲算係個同社會年輕一代未脫節嘅人。首先，孫柏文要解釋一下呢句話嘅由來：
有一日，一位年輕巴士乘客，因為睇唔過眼前面有位阿叔，講電話講得好大聲，所以就拍咗嗰位阿叔嘅膊頭。唔拍猶自可，一拍麻煩多，阿叔被拍膊頭之後，即刻發難，而呢篇文章嘅開場白，就係對答中多句精采句子其中一句。
19日瀏覽人次百二萬
咁坐喺對面嘅乘客，就用手機拍咗佢哋對答嘅過程，跟住就放上網。如果大家想睇完段短片，先至繼續睇我呢篇文章，就可以去youtube.com，跟住用以下嘅詞彙：「巴士阿叔」、「林尚義」、「巴士」、「阿叔」，去搜尋呢段片。
大家可能會問：「點解孫柏文今日要用隻金手指，為大家篤一段網上短片出嚟？」其實，原因實在太多，今日我希望先從一個通識教學嘅角度，同大家討論一吓呢段短片。
首先從商業角度去討論。根據紀錄，呢段「巴士阿叔」短片係喺4月29日被人放上網；跟住5月9日，就有人將短片加上字幕，將裏面嘅對答過程用文字表達出嚟。可能因為香港獨有嘅三文兩語文化，到5月11日，有英文字幕版本嘅短片亦放咗上網畀人下載。到今日，只不過係呢段短片上網時間短短嘅第19日，已經有超過120萬人次睇過。
精警句子網上已有售
有人更將「巴士阿叔」講過嘅獨白聲帶抽出，進行剪接、加插音樂，變成MusicVideo，跟住再放上網。亦有人將「巴士阿叔」講過嘅獨白聲帶，配其他畫面，製造新短片。原先嘅短片成功啓發新嘅短片，就有如百花齊放般出現，而新出現嘅短片，亦令到短片嘅初版更受歡迎。
到噚日，我發現有人已經將「我有壓力，你有壓力，你做咩挑釁我呀？」呢句說話，印上Ｔ恤，喺網上出售。喺呢19日裏面，段短片亦啓發咗好多大大小小嘅網路日誌去討論。
我今日講嘅流程，唔似傳統影片公司做嘅流程咩？由製作、包裝、發放、銷售相關產品，唔似廸士尼慣用嘅手法嗎？最厲害嘅係，我深信由兩位主角、攝影師、加插字幕嘅有心人，至到製造新短片嘅網友，以及出售Ｔ恤嘅生意人，不單止沒有正式合作，甚至乎完全唔識對方。
傳統傳媒善用舊渠道
今時今日呢個世界，互聯網已經提供各式各樣嘅服務，令到一班唔識對方嘅人，可以複製出以前傳統傳媒公司可以做嘅嘢。就連嗰啲話傳統傳媒公司仍有價值，仲有統籌同帶領project作用嘅人，我相信佢哋都要檢討吓自己嘅論調。
不過最後，如果傳統傳媒公司可以引用互聯網提供嘅服務同發放渠道，亦可能係一條出路。例如，早一排《蘋果日報》突發組嘅同事，如果不單止成功捕捉到魔警同警員被槍擊嘅照片，仲可以喺事發嘅隧道嘅牆上，貼上無線鏡頭，拍低之後嘅片段，加入廣告，擺上離岸例如youtube.com等網站發放，都可能變為另一個搵錢途徑。
聽日，就講吓我同利世民兄因「巴士阿叔」短片，而啓發出來有關統治及政治學嘅討論。
孫柏文