本港以至海外交易所對上市公司發放資訊，特別係對股價敏感嘅資料，好多時會有嚴格規定。為免違反上市規則，好多公司董事喺會見傳媒前，都會先上堂，學習應對傳媒嘅技巧。不過，亦有人與生俱來，具備這方面天份，好似網通董事長張春江，噚日舉行股東大會後見記者，回應集團係咪出售亞洲網通，就妙語連珠。
記者：集團係咪出售亞洲網通？
張：出售係其中一個考慮方案……
記者追問：出售亞洲網通的估值呢？
張：當然有呢個數字，但呢個係我嘅秘密，不能告訴你。
記者再問：出售亞洲網通有冇定時間表？
張：你真頑強，如果我希望嘅話，會係明天早上。
有記者問內地電信重組係咪有進展？
張：我睇你係首次參加我哋（網通）嘅會議，有關問題我已講得好清楚，目前為止冇呢方面進一步嘅資料。
最利害嘅係，佢每條問題都係笑住回應，仲好有禮貌咁答你，搞到大家都冇符。難怪經過合併重組，人事及架構複雜嘅網通，都要搵呢位前信產部部長坐鎮。