噚日係文化大革命40周年，文革虛耗咗整整一代人嘅光陰，好多知識分子同精英更被迫害至死，真係諗起都心酸，如果唔係呢場浩劫，中國𠵱家可能已經拍得住美國。呢個教訓實在好值得紀念同警惕，可惜中央政府玩低調，當係不提不存在咁，好似想人唔記得，費事激起人民對共產黨嘅反感。
中央當冇事發生，香港啲左派自然要緊跟中央，唔係左閃右避，就係封嘴唔評論！結果喺呢個「神聖嘅日子」，啲左派梗係冇去紀念文革，反而去晒小西灣嘅漢華中學地盤，搞工程平頂儀式，為新校舍慶祝。好似中聯辦主任助理王如登咁，八方問佢文革40周年有乜感想，登哥即刻耍手擰頭唔講，繼續參觀新校舍。
振英哥自稱當年得10歲
至於成日俾人話係地下黨員嘅梁振英，佢同登哥一樣，對文革40周年冇乜嘢講，佢淨係話內地搞文革時，先至得嗰10歲。唔知係咪想乘機劃清界線，話自己當年年少無知，所以唔評論呢啲敏感問題呢？
坦白啲嗰個叫葉國謙。謙哥話，文革對中國真係影響深遠，呢個真係好深刻嘅教訓，文革嗰時佢仲喺漢華讀中學，佢都算係半個熱血青年，上堂要研究熟讀毛選、課餘時間就關注內地嘅紅衞兵大串連。好彩內地嗰時冇將文革輸出香港，如果唔係，謙哥分分鐘就要帶頭公開批鬥啲老師，要佢哋跪玻璃反省階級立場。
謙哥話領導已吸取教訓
謙哥話，始終香港唔係內地，佢哋都係關注吓啫，冇接觸過正牌紅衞兵，甚至去內地支援革命，內地對文革已經有定論，都唔係迴避嘅，相信國家領導人已經吸取咗文革教訓啦！
香港受文革影響比較少，最深刻嘅都係六七暴動。當年俾港英迫害過嘅兩屆政協、𠵱家好支持普選嘅翟暖暉話，香港嗰時係冇乜文革氣氛，因為廖承志當時叫大家唔好喺外邊搞呢啲嘢，咁新華社都好識做啦，但翟暖暉個人覺得文革個出發點係好，六十年代香港有啲左派都已經開始腐化，睇到《人民日報》社論話要「靈魂深處鬧革命」，佢個人梗係支持啦！
爆料熱線：29290000、27860099
報料傳真：26239278
報料電郵：[email protected]