聽日全球同步上映嘅《達文西密碼》鬧得全城熱哄，套戲情節緊張仲有湯漢斯擔正，好睇就梗㗎嘞，不過電影公司為力谷呢套備受教會爭議嘅電影，居然搞咗個非常幼稚嘅全球「達文西解碼之旅」遊戲。自認河國榮二世嘅鬼佬Brian試玩後大彈：「要人無厘頭走勻8個地鐵站，太無聊、太簡單、太嘥時間，玩法可唔可以畀多啲深度呀！」
記者：許維雅
攝影：林柏鈞
走勻8個地鐵站
一身《達文西密碼》主角蘭登打扮嘅Brian（布偉傑）聲稱：「我係無綫御用鬼佬河國榮二世，本身對解碼玩意興趣唔大，不過一來套戲就嚟上，湊吓熱鬧無妨，二來親身試玩解碼遊戲又可以幫讀者搵出答案，一個唔小心中埋獎仲可以免費遊歐洲，正到痹。」其實成個解碼遊戲話難唔難，一味得個煩字！參加者要先去太子、旺角、尖沙嘴、太古、中環、金鐘、北角同銅鑼灣8個地鐵站，集齊8個地鐵站嘅指定密碼符號，然後去世貿中心消費任何貨品換領1張遊戲表格，麻麻煩煩咁填啱各地鐵站嘅對照密碼符號就叫過第一關；第二關仲儍，世貿整咗個甚麼「世貿中心終極密碼館」，館裏面棟咗幅有幾千個蒙羅麗莎頭嘅畫，無錯，就係要你數啱裏面有幾多個蒙羅麗莎人頭！數完填表，填完表等運到，仲要得1個中獎名額咁大把，一句講晒係個極之浪費青春嘅無厘頭版野外定向抽獎遊戲！
玩後感：太低能！
玩咗1小時45分鐘終於搵齊答案，Brian拋低一句：「咁容易㗎，太低能喇，一味喺度嘥時間，如果地鐵站啲密碼符號難搵啲，又唔好畀3個答案等人亂撞有幾多個蒙羅麗莎頭，逼人認真啲咁去數，增加難度一定好玩好多。」其實好多人都有興趣玩，不過一見到個玩法個個都耍手擰頭嫌麻煩，𠵱家將答案大公開，等大家唔使用手機都出到貓，跟住答案填表，填完齊齊等運到喇。
遊戲查詢：25764121
網址： http://www.visitdavincicode.com
註：中獎名額1個，獎品歐洲7天遊，與電影男女主角同遊巴黎、倫敦、林肯等地。
嘥咗我105分鐘！
街訪
原著多人買
原著《達文西密碼》一出已經引起迴響，拍成電影仲搞到要打官司，全城忽然對呢套戲極有興趣，連帶有關達文西密碼嘅書都勁好賣。VCD舖同書局店主都話會趁呢段時間盡量入多啲貨，樂文書店店主林小姐話：「原著一向好好賣，套戲上埋，一定會引埋班戲迷買番本，睇吓套戲同原著有乜唔同。丹布朗另一本《魔鬼與天使》同其他有關達文西嘅書都多咗人買，不過我唔會入太多，始終係個熱潮，過咗就無。」
樂文書店（28811150）
地扯：銅鑼灣駱克道506號1樓
