採訪當日，師傅端出菜式時，見到小記，大「讚」︰「嘩！今日化咗妝靚過上次見你好多喎！化妝品魔法真係犀利。」笑住多謝，但心情低到落谷底，為之氣結的時候，見到師傅放喺枱面嘅奪目七彩繽紛菜，亦都不禁「嘩」咗一聲，個人即刻有番啲笑容冇咁Down。計我話，師傅喺廚房，都施展咗七色魔法，你見到就即時一笑泯恩仇，自然食乜都咁開心開胃啦。
記者︰劉昱蘭 攝影︰陳偉強
Model︰Fiona（Salvador）
大紅大辣地獄辣蝦$160（a）
一食落口，原本只係食到啲酸酸辣辣嘅墨西哥香料味道，仲好得戚咁同師傅講，好似加咗茄汁嘅Tabasco咁，唔係好地獄辣，點知隔一陣啲辣味就爆出嚟，連續飲咗2大杯水。師傅話佢食開辣都辣親個嘴，唔食得辣嘅朋友真係要小心。
紅色魔法來源︰哈瓦那辣椒及茄汁
原來健力士世界大全，列咗呢隻哈瓦那辣椒為全世界最辣。哈瓦那辣椒外形似燈籠，係墨西哥人最喜愛的食材，聞落帶有花香同埋柑橘的果味。
中菜西做橙香扒鴨$150（b）
師傅以橙汁及君度干邑作香料，然後將隻鴨煙2個鐘至入味，再蒸個半鐘令佢熟透，熟咗仲會炸一炸，香口啲。橙好少用嚟做中菜，今次脆卜卜嘅煙鴨，咬落有橙味好特別，仲要一啖鴨一啖橙，唔膩又開胃。
橙色魔法來源︰香橙
橙有豐富維他命C就係人都知，原來橙可預防多種癌症，如子宮頸、胰臟、直腸、膀胱及乳癌。
金黃粟米皮包鱸魚配白飯$150（a）
以墨西哥空運來港嘅全條粟米衣，包住鱸魚烤焗15分鐘，粟米衣留住水份，鱸魚食落唔乾身，配以Cayenne辣椒，腥味一掃而空，鮮味滑不留口。
黃色魔法來源︰粟米衣
中國人有荷葉包雞，但絕對冇話用粟米衣包住條魚，香港只係買到一啲濕嘅細粟米衣，絕對唔會好似墨西哥咁，以粟米衣包住成條魚嚟燒。食療嚟講，粟米性平和，任何人都啱食，粟米衣清熱、解毒，好啱夏天食。
路邊綠色 帶子馬蘭頭$85（b）
馬蘭頭係上海有名的冷盤，上海人都會剁碎啲馬蘭頭，加上豆腐乾、麻油、鹽、糖等拌勻嚟食。馬蘭頭好似芫荽，本身有種奇特嘅香味，唔係人人受，攝影哥哥就唔多鍾意，接受到嘅話，佢有蔬菜嘅清新，而且好有咬口好爽口。
綠色魔法來源︰馬蘭頭
馬蘭頭係野菜，常見於路邊、田野和山坡上，自然清純，所以食落特別爽。佢有健脾胃、清熱解毒、利膽退黃、涼血降壓等功效，對急性咽炎、扁桃體炎、口腔炎、牙周炎、創傷出血都具有很好嘅療效。
唔面青雞茸粟米南瓜湯$40（a）
墨西哥人鍾意落香料，最鍾意係芫荽，所以呢個湯雖然冇料，但飲落都有啲芫荽咬咬吓有口感。個湯比較稠身啲，好Creamy有忌廉香。
青色魔法來源︰美洲南瓜
以為南瓜湯係黃色，原來美洲南瓜卻是一種青色的美洲南瓜。原產地係美洲，但後來傳入了歐洲。佢夠低卡路里，減肥一族至啱，而且高鉀、高葉酸、高維他命A。墨西哥人除咗用嚟煮湯，仲鍾意作芝士餅的材料。
藍調清酒CocktailNinja$60（b）
師傅話愈來愈多日本人來港，參加一啲Cocktail比賽，帶起咗用Sake調校Cocktail嘅潮流，代替以前用開嘅伏特加、冧酒、毯酒等。Ninja飲落易入口，皆因用咗橙味力嬌酒，橙味甜，力嬌酒又冇乜酒精，好啱女士們飲。
藍色魔法來源︰橙味力嬌酒
力嬌酒一般都會用嚟調校Cocktail，貪佢酒精成份極低，可以配合多啲其他嘅酒都唔怕，可塑性極高。
煙煙韌韌奶皇紫米糍$30（b）
靈感取自日本巨峰紫謄條，紫謄條將糖漿與巨峰嘅紫色混合，師傅就用落紫米糍度，加入紫米漿，就變咗做紫色，咬落煙韌又有紫米香。
紫色魔法來源︰紫米
紫米又稱長生米，素有「米中極品」之稱，係以前宮中的聖品，俗稱「紫珍珠」，師傅話用泰國紫米先夠香喎。紫米有補腎、健脾暖肝的作用。
墨西哥式耀眼
墨西哥一向以醬料濃味見稱，但今個夏天，AGAVE喺味覺上一反傳統，以魚及雞做主打嘅新菜式，用上淡味一啲嘅醬料配搭，希望多啲人接受到墨西哥菜。醬料變淡但顏色依然咁Sharp，襯番色彩繽紛嘅夏日。
（a）AGAVE
地址︰灣仔駱克道利臨大廈地下
電話︰28663228
上海口味西式賣相
霞飛路嘅菜式保留傳統上海菜風味，但仿效外國菜嘅賣相和烹調方法，令懷舊中菜都有新鮮感又搶眼。今期以全新甜品做主打，主菜亦以香橙一類嘅西餐食材入饌，帶出鮮艷顏色。
（b）霞飛路
地址︰銅鑼灣京士頓街9-11號地下
電話︰28826001
