皇后大道中舊連卡佛門口，的士可以停車等客，故此放工時分，唔少人在此等的士，有時快過喺畢打街中建大廈門口排隊。呢晚公關大姐大安排飯局，叫埋左丁山陪佢，在舊連卡佛門口等。等等吓先至諗起，九龍倉集團真係有錢，閂咗呢邊，將連卡佛搬去國金二期商場，租金相信有番咁上下，但係舊舖有成五層樓面，唔賣出去，又唔出租，丟空咁耐，嘩，機會成本大到難以計算，一來一回，條數甚巨，啲九倉集團小股東唔知會唔會向吳先生反映吓呢。
一上的士，話去中信大廈海都，司機居然唔知喺邊度，即刻改口話去添馬艦隔籬，司機先至話：「係係。」點知一踩油，佢已經唔記得喺萬宜大廈轉右落砵典乍街。慘咯，唯有直去過咗中環中心、中遠大廈，先至轉右落干諾道，走入車群之中，寸步難移。
二十幾分鐘之後，到咗中信海都，左丁山對大姐大講：「如果有地鐵到呢度，就慳番好多時間。」可惜呢，地鐵到咗金鐘站，要再上天橋行十零分鐘先至到，如果拎住一堆重嘢，都幾辛苦。地下鐵路確實係城市最佳交通工具，包準時（香港、東京地鐵系統，全世界一流），冇塞車，話咁快就到。如果東京冇咗地鐵，放工時間你話點樣由新宿揸車去銀座呢？要一兩個鐘頭都似。黃昏時候，左丁山如果由中環去山光道馬會，一定坐地鐵到銅鑼灣站再轉的士，次次準時赴約，唔會遲到。
正因為地鐵可靠，左丁山先至認為，地鐵與九鐵合併，由地鐵主導，唔會係壞事，唔應該反對，事實上亦唔輕易搵到一個反對藉口，除非啲尊貴的議員有此本事。一位地鐵小股東（左丁山一股都冇）話地鐵合併九鐵後，放棄車票價格調整權（fareautonomy），改用一個「可加可減」公式，好蝕底喎。牌面係咁睇啫，有個公式重好，以後加價，議員冇聲出，政府冇嘢講。上一次地鐵話加價，受董特首「垂注」，即刻加唔成，講鬼「票價調整權」咩，將一個似有實無嘅主動權換番一條硬性公式，似笨實精！