想成為一個資深高達Fans，首先要對高達歷史非常熟悉，特別要了解當中錯綜複雜的人物關係、國家鬥爭，真係睇少一集都唔明！今個月一連推出2套Z高達電影，竟然一改多年前寫下的結局，不過一班資深又忠心的Fans竟然話「改得好！」至於為電影推出的劇場版模型，數量少，而且得戲院會場先有得賣，咁巴閉？搵香港模型王評透明版高達：「呢副要儲，但唔好砌！」
記者：羅灝汶 攝影：林栢鈞、楊錦文
模型電擊王小檔案
自小對模型有濃烈興趣，第一副完成的模型是幼稚園時期的《鐵金剛》！從事玩具樣辦製作10多年，2001年首次參與瑞華行舉辦的HGUC模型大賽，同年參加「香港電擊高達模型王大賽2001」專業組，成為入圍作品。2002年正式成為香港模型製作人協會的成員，並再參與「香港電擊高達模型王大賽2002」專業組成為入圍作品。最經典的是於2003年首次以1/100比例模型出賽「香港電擊高達模型王2003」專業組，獲得冠軍殊榮，同年代表香港參與模型界最高名銜的「電擊王大賽」，並奪得「第五代電擊高達模型王」。暫時全港只有梁禮傑及05的香港電擊冠軍，可以得到日本電擊王最高殊榮。
首映賣８成
為電影而推出的《機動戰士Z高達》劇場版模型，總共有3盒，第一盒的1/144MKII以《機動戰士Z高達》首部曲的電影海報為封面，不過上一次《機動戰士Z高達》上映時，香港代理入不到貨搞到全線斷市，只有極少水貨流入市面，估計市值要3百多元不等。啱啱過去的5月11日及嚟緊18日，分別上映《機動戰士Z高達Ⅱ－戀人們》及《機動戰士Z高達Ⅲ－星之躍動是愛》，有見及此，香港代理提早向日本攞貨，最後引入一定配額模型，亦只有播放電影的現場才有發售，據知首映日已經去貨8成，餘下配額於哪間戲院發售，還要等待官方公布。（查詢：24331828）
「淨係儲封面都抵！」
今次小記特別向代理借出2盒限量版模型，給予前「電擊高達模型王」梁禮傑試砌，原來透明特別版比較MG或者HG系列模型，要花更多心機。梁禮傑：「透明版的組件取出時，好容易會令到模型表面出現破損，令到完成品不美觀，所以每一個組件的接駁位置要小心剪3至4下，先可以保持原狀。」嘩！一個組件閒閒哋有4、5個水口，整副模型有幾百組件，一睇就知花工夫。不過副模型對於模型高手來講，難度唔算高，又由於係透明，無得改裝，梁：「呢兩盒模型並唔難砌，不過好花心血，因為透明版我哋都唔可以有太多額外加工，如果用作珍藏就絕對一流，淨係儲模型封面都抵，不過想玩改裝就唔好用呢兩盒喇。」
Fans讚新結局：「富野想切斷ZZ關係」
睇完劇場版模型後，就輪到Fans們講講Z高達新結局。資深高達迷Andy同Bill就話：「睇完第3集首映後我哋知道有兩樣嘢，一就是哈馬加自行離開地球圈、二就是嘉美尤並冇失常，有以上兩點我哋已經好肯定《機動戰士Z高達》原創人──富野由悠季先生，希望完全切斷同ZZ高達嘅關係，最大原因是ZZ高達並不是由他直接監督，而且版權問題令到佢想全新改變結局，我哋非常滿意呢一個新結局，好夠新鮮感，咁亦令我哋期望富野由悠季先生可以創作出外傳──撰寫阿寶於地球軟禁後如何成立隆巴立部隊，填補0087至0093的空白歷史。另外，3套電影其實有一套半係重新創作，所以變動都好大呢！」
首映反應
關智斌（Kenny）：「我自小就係超級高達Fans，奈何小朋友時唔夠零用錢，長大後就瘋狂買心頭好，現時家中已收藏過千件高達玩具！當中不少係珍藏版，兩副劇場版模型都係必儲。我對於今次個結局好滿意，總好過將嘉美尤整到神志不清，更期待有其他前傳新故事。」
喬寶寶：「我自己唔算係頂級高達Fans，不過聽朋友講都知道個結局改咗，佢哋話之前個Ending好Sad，我見到最後主角可以大團圓，幾好吖。」
阿升（殘酷一叮三人組）：「我自己就唔係成日走去買高達模型，不過就特別鍾意嘉美尤同阿寶嘅年代，今次睇之前都知道個結局會有改變，所以都唔係好大衝擊，不過嘉美尤冇儍到，日後ZZ高達個故事就冇得接駁落去喇。」
