「在2006國際汽車零部件博覽及研討會中，最矚目的展品是11部由本地改裝公司操刀的改裝車，它們在外觀上有變動的同時，機械配搭也有一定程度的改裝，實行向來自世界各地嘅參觀者，展示我哋香港改車界嘅實力！」
記者：鄭達基
攝影：陳盛臣
「11部參展改裝車中，炙手可熱係狂改Jazz、超輕量GolfGTI，還有花花日產Fairlady跟本田S2000；其中以本田Jazz最揼本，而GolfGTI亦唔弱，裝咗好多碳纖件，話要走輕量化路線咁話。可惜今次博覽會只限業內人士參觀，所以即刻同你直擊現場，一齊大開眼界。」
氮氣Jazz
這部氮氣Jazz，齋睇外形都知佢係堅料，因為加咗全車包圍嘅同時，仲換埋輕量化嘅碳纖頭冚和白色17吋WORKS跑車合金胎軨，型呢？哈，點知佢啲機械Setting仲勁，有SHOWA跑車避震連OBK彈弓，尾喉仲換埋HKS嘅出品㖭！但係最正都係佢加咗NOS氮氣加速，起步加速反應明顯強很多。
火紅輕量Golf
呢期車壇最Hit嘅掀背車肯定係福士GolfGTI，因為佢雖然車仔細細，但勝在好彎兼易改；至於呢部火紅色的輕量化GolfGTI，外觀裝有包圍外，也有碳纖鏡殼、頭冚跟尾翼，胎軨則是18吋的OZ款式，制動系統也換上Brembo的卡鉗，真係話停就停。
花花淑女
真係點都估唔到，呢部花喱花碌嘅日產Fairlady原來係甩尾高手。跟足日本D-1規格改裝嘅佢，當中包括了甩尾專用的懸掛、底架跟底擔，還有是2Way嘅PowerLock，有齊咁多改裝Parts，要甩尾真係話咁易。
全身盡「碳」Supra
看起來以為係全黑色嘅豐田Supra，查實係加裝碳纖包圍後的錯覺，它跟足賽車的氣流動力學去改裝，其中車尾底部的擾流板跟大大的尾翼，便是好例子；但是我最喜歡還是它所配用的4輪18吋電鍍軨。
甩尾王S2000
又一部加晒碳纖包圍嘅本田S2000，最型之處除咗佢個Look好Sporty外，最正斗係佢所配用嘅一套Enkei跑車胎軨，加上佢堪稱係車壇上近年嘅甩尾王，揸住佢去甩尾都咪話唔型。
鷗翼Benz 另類選擇
是次博覽會的另一角，展出了兩部與別不同嘅跑車，它們分別是改用鷗翼車門設計嘅平治SL，以及RAZARP1。前者是近年本港罕見的鷗翼平治，外觀上雖然無大變，但改換鷗翼車門設計之後即刻型晒。後者則是香港汽車品牌RAZAR的自家生產跑車，由設計至正式推出時間接近兩年，P1是部單座位跑車，外觀仲好型㖭！
展品多的是
由於這次博覽會主要是供業內人士參觀，所以場內展出咗不同的汽車零件，例如由DuPont生產的引擎塑膠部件、香港理工大學發明嘅LED車燈控制，還有是D2RacingSport跑車避震等等，定必令你目不暇給。
博覽會知多啲
2006國際汽車零部件博覽及研討會齊集了約150名來自中國、香港、台灣跟英國等地嘅參展商，展出部件包括汽車用具、維修護理等產品，當中除咗有多部改裝車外，還有裝上香港製造車身嘅旅遊巴士及汽車護理公司，同場仲有來自世界各地嘅汽車專才，主持介紹未來汽車業發展的講座或研討會，可惜只限業內人士參觀！
2006國際汽車零部件博覽及研討會
日期：5月16至17日
時間：9:00am-6:00pm（16/5）
9:00am-4:00pm（17/5）
地點：灣仔香港會議展覽中心Hall2
網址： http://www.autopartsfair.net
註：只供18歲以上業內人士參觀