市建局收樓成日都問題多多，如果啲居民好大反響，就真係有排拖、有排煩。身為市建局非執行董事嘅梁家傑大狀（圖）就話，入咗市建局一年，真係感受良多，覺得市建局係時候檢討吓「市區重建策略」。
梁大狀有乜好橋？佢建議政府喺市區重建問題上，採取「從下而上」嘅新策略，由親自收樓重建呢種角色，變為只擔當促進者。具體建議包括成立一個基金，畀啲受重建影響嘅居民申請貸款，等佢哋自己請則師同測量師度掂重建方向，畀佢哋同財團一樣入標。
梁大狀話呢個建議一舉三得，市民好歡喜政府聽佢哋意見、專業人士就會多咗工作機會；就算煲呔都應該拍手，事關配合到佢話放權地區嘅概念啫。梁大狀唔係講吓就算，聽日佢會喺立法會提出動議辯論，希望各大黨派都發表吓意見，等市民自己評評分，究竟邊個議員嘅建議最啱聽。
爆料熱線：29290000、27860099
報料傳真：26239278
報料電郵：pf_lee@appledaily.com