卿姐婚變俾人煲到大一大，無論佢同已婚17年嘅丈夫潘松輝關係變成點，始終都係私人嘢，其實真係毋須要向外高調公布，難怪佢知道有狗仔隊跟佢後好勞氣，大鬧人哋侵犯佢私隱。
范太剛強 蔡菜子要求高
不過，卿姐婚變事件令八方留意到，原來立法會11位女議員入面，都有幾多婚姻唔如意。除咗卿姐據報搞緊離婚手續，自由黨副主席劉健儀同埋大狀黨嘅Margaret吳據聞都離咗婚，前者有一個囝囝，後者就冇，好彩兩位女強人都好堅強，冇受婚變影響，喺工作上都成就非凡。
最慘嗰個，不得不數主席范太。係人都知，佢同老公范尚德好恩愛，嗰陣范太參加直選，范生就跟佢一齊企街派單張，真係廿四孝老公，可惜范生喺04年年底，即係范太當選後無耐，就因為肝臟癌細胞擴散過身，終年65歲，范太都傷心咗好一陣子，好彩最終都捱過，回復番剛強不屈嘅主席身份。
當然，做單身女士都唔係好好，至少冇咗個人可以畀個膊頭自己挨吓依靠吓。立法會都有三位女將至今未婚，就係嫻姐、蔡菜子同Mandy譚喇。嫻姐一生奉獻工運，相信都係因為咁奉送大好姻緣；蔡菜子聽聞都有過追求者，唔知點解又冇咗下文，莫非福建嘅女人要求特別高？議會新丁Mandy就冇乜提起過感情問題；既然𠵱家佢積極改變形象冧選民，唔知會唔會因為咁催旺埋桃花運呢？
既然立法會入面大多數嘅女議員都係獨身，卿姐其實可以將班姊姊妹妹組織起嚟，成立一個「獨身黨」，但就不一定要講政治嘅，傾吓單身女人唔易做囉！
尊貴議員 也有辛酸一面
講真，立法會議員雖然好似好尊貴、好高高在上咁，但查實都有唔少辛酸嘢，單單講一日開會開到黑，已經非一般人可以忍受，就連放假都要出席活動做主禮嘉賓等等，根本就冇時間陪屋企人。
對於已婚嘅女議員，確實係一個難題，幸好立法會內仲有四位女議員，包括余大狀、周梁、梁劉柔芬以及李鳳英咁，都可以有個完完整整嘅家庭，而且佢哋個另一半，尤其前三位女議員嘅老公，更加成日陪住老婆出嚟亮相，真係好溫馨，八方都希望立法會個個女議員都可以咁幸福啦。
爆料熱線：29290000、27860099
報料傳真：26239278
報料電郵：[email protected]