數碼影音：新孖鏡10倍變焦　塘邊鶴1秒Zoom埋身

今年年初，柯達推出一部具備超廣角同5倍光學變焦的雙鏡數碼相機V570，其破格設計確實吸引到唔少玩家。今回品牌重施故技，新作V610同樣備有雙鏡頭，不過，賣點唔再係超廣角，而是力谷其10倍光學變焦功能，機身細細但兼具長炮，變焦速度令人滿意。

記者：招佩珊　攝影：楊錦文
模特兒：Karen@Salvador

V610沿用V570雙鏡頭設計，但新機無用番V570支23mm超廣角鏡，反而換上一支38-114mm，另一支就係130-380mm，雖然冇咁Wide，幸好遠攝能力計埋有10倍，搭埋數碼更可達40倍變焦效果！

■新機最廣角得番38mm，始終唔夠Wide。

■切換到130mm(約3倍變焦)，畫面拉近至鶴群。

■10倍光學變焦(T)近到可以數到有幾多隻鶴。

■連嘴部顏色都睇得清楚，有雜訊但唔算嚴重。

高倍變焦唔使伸鏡

市面上已有10倍光學變焦DC仔，但V610可取之處係鏡頭唔使伸出伸入，整體上安靜得多。當由W（廣角）轉去T（變焦）時，要鬆開再㩒先完成切換鏡頭，畫面亦同時突然Zoom大咗少少，好似跳咗級咁，感覺到換咗鏡，而整個過程需時約1秒。加埋4倍數碼變焦，V610合計有高達40倍的變焦能力，當筆者以40倍變焦影相時，被攝物勁郁，但相片無大幅度的鬆郁矇，證明其內置數碼防震功能發揮到功效，惟獨相片出現明顯雜訊。筆者諗唔明，點解V610唔加埋23mm超廣角，超殺喎！當然又係市場策略，話唔定幾個月後真係出部23mm加10倍變焦型號，到時又要換機咯！

■機頂揀影相定拍片，拍攝模式掣搬咗落機背。

■屏幕左邊有變焦範圍顯示，W為38mm，T係380mm，最頂係數碼變焦效果。

加大屏幕玩埋藍芽

相比上一代孖鏡機，V610像素由536萬升級至636萬，而屏幕由2.5吋增大至2.8吋，睇相更見闊落清晰。V610亦加入藍芽，可與有藍芽裝置如手機、電腦等作無線聯繫，但只限於傳相，不可傳影片；1張約300kb相片由相機傳到手機約2秒，要Share幾張相用藍芽的確方便，但一大批以MB計的相片，還是用Cable快夾妥。另外，V610亦加入PerfectTouch技術，用家可直接在相機上執相，例如相片顏色過淡、偏色、Over/Under都可以修正；V610無23mm超廣角，總算有全景拍攝模式補數，可以選擇從左至右或右至左拍攝3張相片，相機會自動將相片駁埋，變成1張超廣角相片。