春秋兩季都係枸杞菜當造嘅時間。枸杞全棵都係寶，由枸杞子、葉到莖都有食療功效。枸杞嘅嫩葉就係我哋成日食嘅枸杞菜。揀枸杞菜時，記住要揀啲菜葉係深綠色同夠茂密先至靚。枸杞菜含豐富維他命B2同C、葡萄糖、亞油酸、菸酸同多種谷氨酸等，有助抑制脂肪喺肝細胞內沉積，更能促進肝細胞嘅新生，對膽囊、食道起抗痙攣止痛效用。
雖然枸杞咁有益，但有陣甘甘苦苦嘅味道，唔係個個鍾意食。想令枸杞菜更易入口，加啲糖嚟炒係最好嘅方法。如果打算用枸杞菜嚟滾湯嘅話，可以揀枝梗粗壯嘅，味道會較濃，甘甘哋嘅枸杞菜用嚟滾豬肝、瘦肉湯，好有益。