一到夏天，酸酸甜甜嘅菜式就最啱屋企人。我最鍾意用蕌頭嚟煮魚，因為味道酸中帶甜最開胃。蕌頭其實係一種叫薤菜根部嘅卵狀球莖，又稱為「晶子」，有解除胸悶脹滿同治咳化痰嘅功效。近代營養分析都發現，蕌頭有好豐富維他命，而且跟葱、蒜一樣被評為有抗生作用。我用嚟煮嘅蕌頭係用白醋浸過嘅，透明好似水晶咁，夠爽口，蒸魚時加十粒八粒（連汁），再加啲薑同辣椒已經好好食，我試過用蕌頭蒸唔同嘅魚，發現用嚟配鱸魚、烏頭味道最夾。
