電影《詭絲》導演蘇照彬噚日喺台北率領演員張震同徐熙媛（大S），出征康城影展嘅記者會，大S話佢第一次去國際影展，心情複雜，佢自稱係江口洋介嘅fans，佢話早前同佢拍床戲時心情好鬼緊張，仲刻意避開江口㖭！
該脫則脫
而埋位嗰陣，大S竟然四肢僵硬兼頻頻NG，佢接受記者訪問時話：「當日我拍這場戲時還未和仔仔（周渝民）交往，不知道他看了有甚麼反應？」而導演蘇照彬就話：「該場戲很激情，男女演員該脫的都脫了，可能是大S面對偶像放不開，不到一分鐘的床戲，足足兩天才拍好。」
而張震在旁也不忘揶揄大S話：「我沒有激情戲，所以沒有難題。」激到大S死死吓！但大S嘅男朋友仔仔同侯佩岑拍電視劇《美味關係》嘅kiss戲亦備受矚目，大S已搶先話會好好檢查劇本，而仔仔都唔敢亂嚟，目前仔仔同侯佩岑最親密嘅戲，都只係一齊食大牌檔被警察追趕，因而要喺烈日下連續奔跑四個鐘，來回跑三十幾次，一啲都唔浪漫。
