五一黃金周點解咁少人嚟香港玩？呢個問題大家都好想知，尤其好想聽吓究竟政府會有乜嘢拆彈良方。民建聯噚日搞咗個相關論壇，旅遊事務專員區璟智原本應承咗出席，點知區小姐喺啱啱過咗嘅星期日，跟咗老闆葉澍堃局長去昆明外訪，無緣去到論壇親自講解政府睇法，搞到大家都好冇癮。
好彩，個論壇都仲有業界撐場，康泰旅行社副總經理陳建鵬喺會上勁插導遊唔專業，成日鋸內地團遊客，被行內人稱為「刀手」，有時揼低啲客喺一個景點就三粒鐘都唔見人，目的只係希望佢哋喺嗰度買多啲嘢，怪唔得愈來愈少人嚟香港。
同樣有份出席論壇、香港旅遊業僱員總會理事余莉華就為同業平反，話樹大有枯枝，好多行業都係咁，但重點係：好多導遊都好有專業操守，希望大家都體諒導遊嘅苦況喎。
爆料熱線：29290000、27860099
報料傳真：26239278
報料電郵：[email protected]