「大眾踩單車郊野上……」小記住喺新界區，單車係我其中一個出入工具，最鍾意就係由一區踩到另一區，踩單車搵食對我嚟講簡直EasyJob。今次由大圍出發，踩入大埔，辛苦？好老實講，係㗎，但途中那種悠閒的樂趣、對住大海叫走鬱悶的快感，並不能在高級餐廳找得到。
記者︰方綺君
攝影︰林栢鈞
模特兒︰Carol、Ellen@Salvador
租車好Easy
大圍火車站旁有不少租單車的地方，租全日都是數十元，一般都可於大埔或大尾篤還車，提提大家記得租車前試清楚座位高度和煞掣等配件，自然踩得安全啦！
海福單車公司（26941936）
地址︰大圍海福花園商場45號
收費：$40（大埔交車），$20（大圍交車）
新鮮試打 食勻全大埔
入到大埔，旁邊又可以放單車又多食肆，但呢期最正嘅要數新開業1個月的糖黐豆。聽個名以為淨係得甜品，原來還有小食、拉麵及飯。最啱踩完單車，你想大擦一餐，但我只想嚐嚐甜品的朋友們。店廚杜生為做好店中的甜品糖水，居然試勻所有大埔嘅糖水攞料，實行知彼知己，1星期亦會推出一至兩個新菜式吸引食客。招牌糖水糖黐豆的其中一款材料大珍珠，並非普通粉圓，更粒粒專誠由台灣入口。最唔話得係杜生每1個鐘就煲一煲大珍珠，1個鐘內賣唔晒的話，杜生會狠心倒晒！因為大珍珠放久了會變腍及黏在一起，為求Keep住爽口質素，真係唔新鮮唔要，必試！
糖黐豆$20
咋喳、大珍珠、涼粉、椰果、芒果、芝麻珍珠、忌廉等N樣嘢喺晒1碗，你會覺得好甜好滯？剛剛相反。杜生話食嘅時候唔好攪勻，要食其豐富的層次口感。
紅豆合桃芝麻糊$16
混合合桃露、紅豆和黑芝麻糊，黑芝麻要慢火炒40分鐘，用絲苗米做的米漿用石磨磨，坊間已少見。芝麻唔糊口，充滿芝麻香，和外面用豆粉的店舖無得比。
老虎蝦球拉麵$34
用肉爽味鮮的特大青島老虎蝦；又用貴本地3倍的入口日本拉麵，豬骨湯底熬足6小時，因為湯從大煲的底部出水倒出，所以好少油。
日式雞軟骨煎餃$18
雞軟骨有嚼勁，不用肉餡感覺不膩，一個人都可以食成碟。
糖黐豆（26576638）
地址︰大埔運頭街75號地下
營業時間︰4:00pm-2:00am
響朵大牌檔
從大圍火車站附近的租車點踩約30分鐘便到著名的沙角邨大牌檔。老死街坊力推劉萬利最滋味，其晚巿的鑊氣小炒固然是焦點所在，但日間踏單車到來，也可來碟小食、燒味、粉麵或碟頭飯。這裏由早、午、茶餐到晚上小炒甚麼也有，最愛還是那久違了的大牌檔格局。
時令涼瓜斑腩炒飯$27
大熱天食瓜好，份量多多碟頭飯夠兩個女仔食，正好為漫長單車旅程打頭陣。
豬扒包$10
麵包香脆，加上大大塊炸至金黃色的豬扒，唔食真係對唔住自己。
食客Forrest︰「我細細個幫襯到𠵱家啦！最鍾意食雲吞麵，爽口又無鹼水味。」
劉萬利咖啡粉麵燒臘飯（26487128）
地址︰沙田沙角邨熟食中心7-9號
營業時間︰6:00am-1:00am
中途加油站
踩呀踩，離沙角邨約40分鐘，到吐露港大學段的水警基地附近，會發現一艘輪船「肥陳」，船上只有一位婆婆賣魚蛋、公仔麵等簡單小食，不過對Non-stop地踩的單車友來說，「肥陳」簡直就如荒漠中的甘露！況且這裏涼風送爽，由陸路踩，忽爾踏進艇上人家，面對海天一色吐露港，加上方圓十里內也沒有食肆，坐低歇一歇，唞順條氣，比刻意營造氣氛的新派餐廳來得有風味。之後還要踩1個小時才到達大埔，小記親身試驗過，真係幾甘㗎！
魚蛋$5/串
有辣有唔辣，稍嫌辣味魚蛋的辣汁只香不辣。
餐蛋麵$18
飽肚的只得公仔麵，配料亦只腸仔、餐肉及雞蛋三款任選其中兩樣。
肥陳
地址︰吐露港單車徑大學段
（水警基地旁，不設電話）