一直唔係太想講同煲呔究竟有幾friend嘅鄭大班，呢排喺立法會好似無聲無息咁，同最初無心插柳踩咗入去、因為領匯而搞到滿城風雨嘅情況絕對唔同。好多議員私下都話，大班近期真係靜過鬼，除咗同佢有少少關係嘅公營廣播檢討講多兩嘴之外，幾乎都係封口咁滯。好似嘉亨灣事件，換轉係以前，唔插到政府暈就奇啦；但呢幾日，大班都冇好似以前咁嘈喧巴閉，好明顯，作風真係低調咗好多好多。
點解要轉風格？口痕友一般分析：梗係唔想連累煲呔啦。煲呔今年就要預備連任；只要大班講錯一句，肯定俾左派揪住狂砌，屆時又唔知會唔會上綱上線到辣到煲呔嗰度。多一事不如少一事，既然係咁，呢段時間都係無聲勝有聲。睇怕到煲呔成功連任前，大家都好難再聽到大班大大聲鬧人喇。
爆料熱線：29290000、27860099
報料傳真：26239278
報料電郵：[email protected]