今年荷李活猛片如雲，唔計已開畫嘅靚佬湯大作之外，呢個月至少仲有《變種特攻》同《達文西密碼》上映，例牌地大作梗有同名遊戲登場。交叉人打埋今集就正式收工，所以結局篇第3集票房肯定大爆，大家不妨趁遊戲版搶閘推出先玩為快，因為遊戲將補足第2、3集之間嘅古仔，令大家對變種世界有更深了解！
文：陳福榮
《X-Men：TheOfficialGame》唔稱呼自己做《X-men3》，事關佢並唔係依足新一集電影故事嚟製作，而係攞正牌專講發生喺《變種特攻2》與《變種特攻：兩極爭霸》兩集之間嘅事，甚有補足古仔用意。為咗跟足電影口味，開發人員特地搵番原版演員擔任配音，再加上畫面表達效果不俗，XB360版更引入咗解像度極高嘅畫面，咁樣就輕易能夠令人投入到《變種特攻》嘅龐大世界觀入面。
狼人率兩同伴參戰
呢隻正宗授權電影遊戲，擔大旗嘅分別為靠對鐵爪除暴安良嘅主角狼人、行動極為敏捷又識得瞬間轉移嘅小丑，以及用冰嚟整路及攻擊敵人嘅冰人。由於佢哋特性唔同，因此喺合共28關裏面需要善用各人嘅特質解決疑難，譬如有關係有條不斷噴火嘅火蛇，想收服佢就當然交由冰人代勞，至於擅長拳腳交嘅小丑則用嚟應付人類士兵，咁打起嚟冇咁暴力唔會血花四濺嘛。不過講到喺Game內最好用嘅，首推冰人喇，事關佢搭冰橋過關又得，用尖冰攻擊敵人又得，對付超勁敵人火蛇更係冇佢唔得！再加埋有其他電影版角色如暴風女神等間場出嚟做吓串星，整體上都算好有豐富嘅《變種特攻》感覺。
幕後班底搞好古仔
咪以為呢隻係食噱頭嘅遊戲，其實寫古仔嘅人來頭不小；由《變種特攻：兩極爭霸》編劇ZakPenn，夥拍傳奇漫畫作家ChrisClaremont負責操刀，跟電影版劇情完全銜接得番。佢嗰28關各有特色，分別由3位超能特攻進行暴力打鬥、潛入冒險及限時任務等工作，亦能強化角色特殊技，並唔係狂㩒掣齋打咁無聊。另外大量喺原著嘅敵人如磁力王同劍齒虎等都會逐一登場，大幅增加戰鬥緊張感，無論係咪Fans都不容走雞。
PROFILE
遊戲類型：動作
對應機種：XB360、XBOX、PS2、GC、PC
遊玩人數：1人
開發廠商：Activision
發售日期：今日推出
