距離特首選舉仲有一段日子，未去到埋身肉搏，但好多人已經喺選舉委員會呢個主戰場摩拳擦掌，至少泛民主派同親中陣營，就喺唔少專業界別展開拉鋸戰，盡量用盡各種方法攞晒所有議席，希望喺選委會更有power。
公民黨嘅冒起，查實真係有好大影響，至少八方已經聽到唔少北京消息話，泛民要攞到100票，真係坐定粒六，事關佢哋主力搶攻嘅專業界別，都係buy佢哋多過親中人士。
雖然，例如勞工同金融等界別，都係俾親中陣營壟斷居多，但泛民依然可以喺法律、教育同社工界度作戰，因為呢啲專業界別人士基於本身所受嘅訓練，比較能獨立思考，就算北京隻手伸到落嚟，佢哋都可以我行我素當佢冇到，揀番信得過嘅泛民；泛民要攞100票，其實有幾難呢？
馬丁反對派形象深入民心
正因如此，據知北大人已經做足有人入場同煲呔跑馬仔做騷嘅評估。至今對煲呔最大威脅嘅頭號敵人，依然係親中派好鬼憎嘅陳四萬。雖然佢最近又出現於周刊封面，明砌班擦鞋仔，又唔肯再講點為之「見步行步」，但好多人都覺得，陳四萬咁錫身，點會出嚟同你陪跑？但咁樣已足以嚇到北大人騰騰震。冇錯，煲呔好難輸，問題係陳四萬民望唔嘢少，你話佢贏得民意支持而最終喺選委會落敗，咁除咗令到呢個選委會制度之荒誕現晒形，更加會令煲呔贏而實輸，到時幾冇面呀。
再數落去，有望挑戰煲呔嘅人真係唔多。有人提馬丁，但馬丁反對派形象實在太過深入民心，𠵱家鍾意中間路線嘅人較多，馬丁睇怕冇行。
另一個有機玩煲呔嘅，就梗係民主女神余大狀。余大狀行出嚟嘅氣質點都好過啲推銷員，加上有專業背景，民望又持續高企，實力不容忽視。要記住余大狀至今都冇為特首選舉做過啲乜；如果佢真係發力，潛力認真無限，所以亦係北京密切監視對象。
余大狀至今都冇講過選唔選，咁又係，時機未到，咁早講嚟把鬼咩。八方惟有問佢母親節點過，原來追求公平公正嘅余大狀，私人生活方面都好公道，因為佢向奶奶同媽媽送上嘅母親節禮物，各自都係一個手袋，認真一視同仁。佢啲囡囡呢，喺上星期六已經送上鮮花做禮物，𠱁到余大狀不知幾開心。
傳真︰2623-9278
電郵︰[email protected]