Karen：謝太，Karen呀。日本好唔好玩？你去咗咁多日，有冇留意住上個禮拜嘅市呀？
謝太：噚晚好夜至返香港，報紙都未睇，e-mail都未check過。聽講個市成個禮拜跌咗百零點，好似冇乜點郁過，除此之外就真係唔多清楚，乜上個禮拜好多事發生咩？
新地配股 觸發跌勢
Karen：係呀。上個禮拜一都仲係食住個「大家話美國加完息」嘅升勢，繼續上，好似繼續開派對咁炒上去；不過到禮拜二，個市就唔同晒。新地（016）十年嚟第一次配股，好似高姿態咁話個市到頂，即刻搞到個派對好似有人㩒熄咗啲音樂，仲要開晒啲燈咁。一配股就搞到恒指由禮拜一收市嘅17301，跌到禮拜五收市淨番16901，來回有成400點。美國股市呢排個勢又好飄忽，啲人對新聯儲局局長講錯嘢好唔滿意，我諗佢嘅蜜月期已經過咗，搞到個市再多一啲變數。
謝太：Karen，我諗你當年仲係細個，我記得87年格林斯潘啱啱上台唔夠3個月，就發生87股災。聯儲局局長呢個位唔易坐，個市都係要過多一排先至會觸摸到新局長諗緊乜。至於新地出嚟配股，其實都未必等於個市見頂。始終新地都係一間對得住小股東嘅公司，10年前佢哋配股之後，個市都有繼續升啦。如果佢哋真係賺到盡，下次配股邊度會有人接貨？我信得過新地唔係間會為咗一筆錢，就放棄同股東多年建立關係嘅公司。不過講到尾，就算覺得個市未見頂，我都唔知道仲有冇啲抵買嘅股票。
Karen：抵買嘅股票就永遠都一定會有，只不過個市升咗咁多嘅時候，就難搵好多咁解之嘛。我啱啱就搵到隻，覺得有值博賠率，呢隻就係深圳市研祥智能科技，股票編號8285。
謝太：8字頭股票？Karen唔係嘛!?
送紅股鎖流通 炒上
Karen：係呀謝太，真係叫你買8字頭股票。呢間研祥智能係做控制電腦溫度嘅零件，以前都有好多基金買過，不過因為04年業績比03年差，05年又好似冇乜起色，所以就一路跌到05年尾。到今年初隻股就開始升，都升咗差唔多130%，但我覺得仲可以追，雖然間公司由03年每1蚊收入，賺到兩毫半子利潤；跌到06年頭3個月，得番1毫4仙，但係收入好似開始有起色。我諗佢哋06年可以賺到03年高峯期嘅利潤，雖然以𠵱家嘅股價，每1蚊利潤，要用20元去買，我都覺得抵買。最重要係佢哋3月宣布10送12股，變相拆細。不過以送紅股方法拆細，就好似當年日本活力門炒上嘅手法一樣，以10送12股為例，因為紅股唔係即刻到手，由公司宣布送股，到股東收到股票嘅時間，變相將多過一半流通嘅股票暫時唔流通，做到人工貨源歸邊，炒上去。
謝太：咁紅股幾時會到股東手？
Karen：6月21號。
謝太：好，Karen幫我落盤買，到差唔多時候提叫我放啦！
Karen：知道！ThankYou謝太。