一啲立法會議員唔滿意領匯，要傳召領匯主席鄭明訓及行政總裁蘇慶和到立法會，如果鄭蘇兩人敢唔去，長毛梁國雄話：「係唔係要押佢哋嚟。」鄭大班議員講得好，港英時代嘅立法會議員係「尊貴的、地位高」；現在啲立法會議員雖然都係「尊貴的」，實際上就畀好多人睇唔起，認為佢哋除咗「為民請命」之外（即係要求政府干預、政府照顧、政府派錢派糖、政府嚴控市場運作、政府係忠嘅、市場係奸嘅等等），唔見得有乜專業知識；就算有（如公民黨大狀係法律精英），佢哋因受咗「大政府、小市場」意識嘅影響，往往傾向於「過份理想主義」。
領匯已經係上市Reit，受港交所及證監會監管，領匯基金單位全屬股民與私人基金擁有，政府賣晒，攞番幾百袋銀紙，正是貨銀兩訖，政府與領匯無干，領匯嘅私人「公司」身份，與新地、長實、麥記、牛記相同，啲立法會議員邊度有權對領匯管理層指指點點？譬如新城市廣場加租，馮檢基、長毛、王國興等，使唔使傳召郭氏三兄弟到立法會解釋呀？渣打銀行以前裁員，蘇利民需唔需要攞到立法會批准呀？
政府之出售公屋商場畀領匯，再將領匯上市，正是因為房屋署管商場管得好失敗，要用私人公司管理手法，希望能夠起死回生。領匯現正削減成本，提高營運效益，啲議員即刻鬼殺咁嘈，直情係公私不分，以為自己高高在上，乜都要管。
到目前為止，冇證據顯示領匯危害市民生活、傷害基層利益。如果他日領匯轄下商場污穢不堪，罪犯橫行，門堪羅雀，內裏商舖全部執笠嘅話，投資者未等到啲高高的、尊貴的議員出聲，已經會趕走領匯啲領導人。到今天為止，香港仍然係一個尊重私有產權嘅社會，領匯已係幾十萬投資者都有份嘅百分之一百私有公司，希望立法會議員尊重，希望佢哋自重，否則俾人當係笑話。