今日，孫柏文首先想同大家傾吓兩個理論。第一就係政府應該尊重香港人「我想賣，你哋想買，咁你出價最高，就賣畀你」嘅自由。我相信呢個係一個作為香港人，個個都會明白嘅道理。就算係外國人嚟到香港買嘢，我哋都會尊重嗰位想賣嘢市民嘅決定。絕對唔會好似花旗國咁，有人想賣嘢（Unocal股東），我哋祖國黃皮膚有人出67蚊高價（中海油），賣家鍾意（Unocal股東），不過因有人搞事（政客），強迫政府介入，政府（花旗國國會）迫賣家要接受花旗國人出嘅63蚊底價(Chevron)，嚴重侵犯賣家私人產權。
第二就係互聯網世界中，私人公司冇得控制大家嘅思想。更大嘅傳媒機構，例如電視台、大報紙、收音機電台等等，都已經被互聯網千千萬萬個網頁、網站圍攻，唔好話控制大家嘅思想，就連大傳媒出錯都會被人揭發。唯一可以打殘呢個「可以確保大家思想自由」嘅互聯網，就係政府。
將繩當蛇 杯弓蛇影
咁大家可能會問：「講咁多理論，孫柏文，你究竟今日想用隻金手指篤啲乜？」金手指今日想篤嘅係祖國中信國安想入股亞視，成為亞視策略性小股東呢單新聞。
中信國安想入股亞視，因為有條殖民地時代遺留落嚟嘅法例，要先得到特區政府嘅行政長官同行政會批准。條法例就係針對外地人，買香港電子傳媒公司，我諗當時殖民政府，心知到殖民獨裁統治概念，非常之唔受本地人歡迎，所以就好似亞視大股東劉長樂咁講，「將繩當蛇，杯弓蛇影」驅使之下，一律禁止啲唔係大英帝國支持者嘅人買電子傳媒公司，特別係針對電視台。不過𠵱家我哋已經被解放軍解放咗，邊度可能會有人想用電視台去搞偉大嘅特區政府？
所以政府應該解禁，如果有外地人想買電視台呢啲遲早銷聲匿迹嘅舊科技，咪俾佢買囉。大家諗吓，如果當年成功收購香港電訊嘅係新加坡電訊公司，而唔係誓保中華人民「戰略性工業」嘅盈科數碼動力，我哋香港人，今日會開心多幾多呢？
令人失望嘅議員
仲有，呢單新聞一出，就令到好多立法會議員有啲冇經大腦嘅反射式反應，好似發羊吊咁話：「冇編輯自主啦！冇言論自由啦！亞視呢個全世界最偉大、最中立嘅傳媒機構會親中啦！」首先，佢有冇睇亞視㗎？亞視係點，大家都知，所以我唔再多講，不過我想知，其實立法會係唔係冇得上網，立法會議員究竟知唔知喺真實世界，科技進步係點㗎？你話做開舊媒體嘅劉慧卿，唔領略互聯網保護大家嘅思想自由都算數。不過就連一向講嘢都有sense，代表資訊科技界嘅單仲偕都咁講，就令到我好失望。孫柏文亦只可以問一句：「Youdon'tgetit？」
再講，如果立法會議員真係有誠意去捍衛言論同通信自由，就應該反對所有政府對市民使用互聯網嘅介入。冇錯，包括捍衛用BT下載在內。如果你一邊話「捍衛通信自由」，不過另一邊就對政府打擊互聯網活動，完全唔反對，甚至非常歡迎，香港年輕人亦都只會心諗：「你班友究竟係唔明，定係你哋淨係識得講自由，不過只係班偽君子？」
孫柏文