外圍美股似已見頂，港股恒指亦由高位17328掉頭回落，上周五低見16845，短短幾日，落了483點，10日線（16987）已失守，暫在20日線（16818）水平獲支持。呢輪新股上市同大藍籌都開動大抽水機，港股在升破16000大關後已累積上升逾8%，在集資壓力下，調整係意料中事，預料市勢會在高位反覆一段較長時間，整固完成後，升勢才會再現。
上禮拜嘅推介，最威係金威集團（910），高見0.365元，比推介時股價大升23.7%；黃金集團（1031）亦不俗，最高2.35元，升12%；最差係高寶綠色（274），最低0.99元，跌13%。威水股可以止賺位繼續持有，特別係金威，今次引入高科植林業務後，應已脫胎換骨，聽聞已有基金敲門想入股，中線仍看0.50元。
高寶急升後急散，上周五收1.01元，由高位1.24元回落，已唔見18.5%，唔單止補回第2個上升裂口（1.07元至1.15元），連第一個（0.97元至1.01元）亦補回部份，睇個勢，擺明係有大盤沽貨，但亦見有大手吸納，若20日線（0.98元）守得住，好友仍有反擊之力。
逆市反彈走勢強
高寶盤數幾好，05年（12月年結）每股盈利0.24元，唔計投資增值之每股盈利為0.15元；如無意外，06年預測每股盈利為0.19元，預測PE只係5.3倍，等佢跌定後兜番轉，博上番高價1.24元。
今日推介中油潔能（260），上周五市勢大跌，佢都可以由低位0.69元「操」番上去，收0.74元，逆市而升1仙，成交仲大幅減至不足2300股。睇走勢，在升破長方形徘徊區高位0.69元阻力後，升上0.75元形成旗形整固，上周五高收，後抽應已完成，短期再上，目標指向0.95元。
中油潔能嘅股權呢輪有好大變動，第2大股東減持6500萬股，德銀亦沽咗2500萬股，但就有其他「大芬」上車，最新係摩根大通增持2263萬股，相信其他亦會好快公布。
中油潔能成功轉型燃氣股後，已變身成為基金股，最新資料係摩根大通持有7.97%、德銀7.65%、LeggMason5.69%，以及IntegratedAsset3.99%，相信基金會繼續上車同增持。基金打完一鋪，洗過牌，執過位，下一鋪可能更勁。
郭兆誠