可能潮人着Tee追名牌追到悶，𠵱家連個Print都要研究埋，要知道邊個名師設計之餘，仲要知埋有咩Message。着名牌，代表有錢，但係唔理咩Print都擺上身就係膚淺。今次BEAMS就貫徹呢個道理，趁1周年搞展覽，仲請埋一群日本Artist搞作品展，將自己升格成為一個藝術創作單位，將Tee徹底變成一件藝術品。
記者：許維雅
攝影：陳偉強
1周年NWBA畫展
BEAMSBOY香港專門店不經不覺已經開業1周年，而BEAMST就由舊年11月起進駐香港。為慶祝開業1周年，I.T於中環舉辦了為期20日嘅BEAMSBOY1stANNIVERSARY&BEAMSTEXHIBITION，除邀得BEAMSDirector永井壽二親臨香港之外，更特別邀請經常同BEAMST合作嘅日本設計組織NWBA（NOWALLBETWEENTHEART）嘅代表嚟香港表演揭開序幕。NWBA成員包括MADSAKI、黑田潔、水野健一郎、山口智子等，今次係首次喺香港展出佢哋嘅作品，而其作品好多時都會印喺BEAMST上。今次嚟香港表演嘅係HirokiTsukuda，佢嘅創作過程極有個人風格。
日期：5月12-31日
時間：12:00nn-6:00pm
地點：中環安蘭街20號
查詢：31991800
BEAMS首件香港別注Tee
BEAMST雖然在日本曾經同多個不同藝術創作單位合作，但香港開業以來都從未與香港Artist出過任何別注Tee，今次經I.T拉攏，首次同古巨基合作。古巨基畫公仔有一手無人不知，卡通公仔KUBI更是他的心血結晶，BEAMS今次就放手將設計重任交由古巨基親自操刀。
古巨基：Tee都係一個媒體
古巨基（古） 記者（記）
記：你自己對於Tee嘅設計有咩睇法？
古：我自己好鍾意美術，我覺得美術創作唔應該局限喺平面或者紙上面，而一件靚嘅Tee唔應該係衣服咁簡單，其實係一個好好嘅媒體。因為Tee嘅流傳度可以好大，有靚同有意思嘅Print透過Tee會更容易交流，更容易同人分享。
記：對於呢件自己設計嘅CrossoverTee，點解會有呢個設計概念？
古：雖然自己都曾經幫KUBI出過Tee，但都係第一次將設計Tee真正放喺時裝舖頭度賣，所以都諗咗好耐點樣設計。好多時Tee都係用番白色，咁KUBI一向用橙色作為搶眼顏色，最後我索性將成件Tee用橙色作為創作念頭。加上自己由細到大都好鍾意火車頭，特別係啲Classic款嘅火車頭，而且呢次係第一次創作，梗要預埋阿仔KUBI。
夢想兜咗個圈
記：對於今次同BEAMS合作有咩感覺？
古：當然好開心有呢次機會，覺得夢想係只要你有恒心，好多時兜咗個圈之後最終都會實現。自己一向好想讀美術，當年19歲嘅時候報讀設計美術學院，因為自己（哈哈……）搞錯咗面試時間，搞到Miss咗讀美術嘅機會。跟住轉轉折折之後入咗娛樂圈，估唔到今次有機會創作自己嘅Tee，感覺好似自己嘅夢想最後都有機會實現。
記：會揀啲咩Tee嚟買呢？
古：我會揀淨色，好似黑色白色咁。Print方面，唔同時期會揀唔同嘅Print，最近我特別鍾意揀啲有含意嘅字，唔會刻意買咩牌子嘅Tee。不過如果開工着嗰啲就會揀啲Detail比較多嘅Tee。
永井壽二：有Hermes影子！
永井壽二（永） 記者（記）
記：今次同古巨基合作之前，本身認唔認識佢呢？
永：唔，之前未見過佢，不過開幕當日早上開過一次會，喺創作上交流過少少心得。
記：有無見過古巨基創作嘅KUBI公仔？有咩感覺？
永：可愛囉！
記：對今次合作有咩睇法？
永：雖然我之前對佢無乜認識，但係我覺得今次係佢打入日本市場嘅好機會。
記：對古巨基設計呢件衫有咩評價？
永：Nice！顏色同Design都好好，不過，我覺得有啲Hermes嘅影子。呀，唔係，我意思即係設計得好好，我好滿意。（之後突然好八卦咁反問：）古巨基究竟幾多歲？
記：30幾！
永：吓？好後生喎！睇唔出喎！（好驚訝咁重複講咗3次）
記：咁你對I.T.有咩睇法呢？
永：Good！我會相信佢哋！
唔識香港設計師
記：對香港印象如何？有無Shopping呢？
永：我嚟過6次，每次時間都好短，我覺得香港係一個好刺激嘅地方。我都有買嘢，最想買就係一啲靚嘅蠟燭，邊度有得買呀？
記：最鍾意香港邊個設計師？
永：無！唔係咁熟喎。如果要我揀一個我好鍾意嘅設計師，我會揀紐約設計師KelvinLyon。
記：BEAMS嚟緊有咩大計？
永：暫時未有，當然我最想BEAMST遍布全世界。
BEAMST（29920235）
尖沙嘴廣東道30號新港中心2樓27號